قازاقستان ۇ و ك مۇحاممەدسابىر بازارباي ۇلى جەكپە-جەگىنە بايلانىستى شاعىم ءتۇسىردى
پاريج. KAZINFORM - فرانتيا استاناسى پاريج قالاسىندا ءوتىپ جاتقان وليمپيادا ويىندارىندا قازاقستان ۇلتتىق وليمپيادالىق كوميتەتى 63,5 كەلى سالماقتا جۇدىرىقتاسقان مۇحاممەدسابىر بازارباي ۇلى مەن گرۋزيالىق لاشا گۋرۋلي اراسىنداعى جەكپە-جەك ناتيجەسىن ءتۇسىندىرۋدى تالاپ ەتىپ، رەسمي تۇردە PBU- عا (Paris boxing Unit) شاعىم ءتۇسىردى.
«قازاقستان ۇ و ك مۇحاممەدسابىر بازارباي ۇلىنىڭ جەكپە-جەگىنە قاتىستى شاعىم ءتۇسىردى. ءبىز بۇل ناتيجەمەن كەلىسپەيمىز جانە PBU- دان تۇسىنىكتىمە تالاپ ەتتىك. بۇدان ح و ك تا حاباردار. ءبىزدىڭ ويىمىزشا، قازاقستاندىق بوكسشى 2024 -جىلعى وليمپيادانىڭ جارتىلاي فينالىنا جولداما بەرەتىن ماڭىزدى كەزدەسۋدە جەڭىسكە جەتتى. وتكەن جەكپە-جەكتىڭ ناتيجەسىن قايتا قاراۋ مۇمكىن ەمەستىگىن دە تۇسىنەمىز. الايدا، ءبىز ءىرى حالىقارالىق جارىستاعى تورەلىك ءادىل ءارى تازا بولعانىن قالايمىز»، - دەدى قازاقستان ۇ و ك باس حاتشىسى جانار ۋتەشيەۆا.
ايتا كەتەيىك، بۇعان دەيىن قازاقستان ۇ و ك قازاقستاندىق بوكسشىلاردىڭ جەكپە-جەگىندە تورەلىك ەتكەن جەكەلەگەن تورەشىلەرگە قاتىستى PBU- عا ەسكەرتۋ جاسادى. ەسكەرتۋ قابىلدانىپ، قازىرگى تاڭدا زەرتتەۋ جۇرگىزىلىپ جاتىر.
ەستەرىڭىزگە سالا كەتەيىك، وسىدان شامالى ۋاقىت بۇرىن مۇحاممەدسابىر بازارباي ۇلى تورەشىلەر شەشىمىمەن جەڭىلىپ قالعان بولاتىن.
اۆتور
كۇنسۇلتان وتارباي
