قازاقستان تۋرالى ۇزدىك روماننىڭ اۆتورى ءومىر بويى اي سايىن 500 دوللار الادى
استانا. KAZINFORM - استانادا «Mecenat.kz» ادەبي سىيلىعىنىڭ IV ماۋسىمىنىڭ جەڭىمپازىن ماراپاتتاۋ ءراسىمى ءوتتى. بۇل تۋرالى مادەنيەت جانە اقپارات مينيسترلىگى مالىمدەدى.
جىل سايىن وتكىزىلەتىن ادەبي بايقاۋ قازىرگى قازاقستاننىڭ شىنايى بەينەسىن كوركەم تىلمەن بەينەلەيتىن شىعارمالاردى انىقتاپ، تالانتتى اۆتورلاردى ناسيحاتتاۋدى ماقسات ەتەدى.
بيىل ءتورتىنشى رەت ۇيىمداستىرىلعان بايقاۋعا 21 اۆتوردان قازاق تىلىندە 9، ورىس تىلىندە 12 قولجازبا ۇسىنىلىپ، حالىقتىق ونلاين داۋىس بەرۋ ناتيجەسىندە جاس قالامگەر ءاليحان جاقسىلىقتىڭ «تۋرگەنيەۆ كوشەسىندەگى ءۇي جۇمىسقا قابىلدايدى» اتتى رومانى ۇزدىك دەپ تانىلدى.
جەڭىمپازعا دەمەۋشى اتىنان ءومىر بويى اي سايىن 500 ا ق ش دوللارى مولشەرىندە تولەنەتىن ەرىكتى اننۋيتەتتىك ساقتاندىرۋ پوليسى تابىستالدى.
ماراپاتتاۋ راسىمىندە ق ر مام ارحيۆ، قۇجاتتاما جانە كىتاپ ءىسى كوميتەتىنىڭ ءتوراعاسى رۋستام الي ۇلى قۇتتىقتاۋ ءسوز سويلەپ، مينيسترلىك تاراپىنان جۇزەگە اسىرىلىپ جاتقان ادەبيەتتى قولداۋ شارالارى تۋرالى ايتتى.
- ادەبيەت -ۇلتتىڭ رۋحاني تىرەگى، ول سانا مەن سەزىمدى تاربيەلەپ، وتكەن مەن بۇگىندى ساباقتاستىرىپ، بولاشاققا باعدار بەرەدى. مادەنيەت جانە اقپارات مينيسترلىگى قالامگەرلەرگە قولداۋ كورسەتۋ ماقساتىندا «ايبوز» ادەبي سىيلىعى، پرەزيدەنتتىك ارناۋلى ادەبي سىيلىق، «دارىن» جاستار سىيلىعى سىندى ماڭىزدى باستامالاردى جۇزەگە اسىرىپ كەلەدى. سونىمەن قاتار وتكەن جىلى قازاقستان جازۋشىلار وداعىمەن ستراتەگيالىق ارىپتەستىك اياسىندا 3 جاڭا جوبا ىسكە اسىرىلدى. مەملەكەت باسشىسىنىڭ 2025 -جىلدى «جۇمىسشى ماماندىقتارى جىلى» دەپ جاريالاۋىنا بايلانىستى، جاس قالامگەرلەرگە ارنالعان «ەرلىك پەن ەڭبەك داستانى» اتتى جاڭا بايقاۋ جاريالاندى. مۇنىڭ بارلىعى - ۇلتتىق ادەبيەتتى دامىتۋعا جانە شىعارماشىلىق قاۋىمداستىقتى قولداۋعا باعىتتالعان كەشەندى جۇمىستاردىڭ ناقتى كورىنىسى. بۇگىنگى بايقاۋدىڭ ەرەكشەلىگى - ونىڭ مەملەكەتتىك بيۋدجەتتەن تاۋەلسىزدىگى. ءبىز مۇنداي ازاماتتىق باستامالاردى جوعارى باعالايمىز، - دەدى رۋستام الي ۇلى.
جوبانىڭ نەگىزىن قالاۋشى ەرلان اسقاربەكوۆ ماۋسىم سايىنعى قاتىسۋشىلار دەڭگەيىنىڭ ارتىپ كەلە جاتقانىن اتاپ ءوتىپ، جەڭىمپاز تۋىندىلاردىڭ بارلىعى شەت تىلدەرىنە اۋدارىلىپ، باسپادان شىعىپ جاتقانىن جەتكىزدى.
اتالعان جۇلدەنى 2022 -جىلى «كۇلپەت» رومانىمەن جازۋشى شارحان قازىعۇل جەڭىپ السا، 2023 -جىلى «ولگەندەر قايتىپ كەلەدى» رومانىنىڭ اۆتورى تۇرىسبەك ساۋكەتايەۆ، 2024 -جىلى «ءومىر بايتەرەگى» رومانىمەن قازاقستاننىڭ ەڭبەك سىڭىرگەن قايراتكەرى، حالىقارالىق «الاش» ادەبي سىيلىعىنىڭ لاۋرەاتى ساۋلە دوسجان يەلەنگەن.
