قازاقستان تاياۋ شىعىس ەلدەرىنەن ءوز ازاماتتارىن ەۆاكۋاتسيالاۋدى اياقتادى
استانا. KAZINFORM - ق ر سىرتقى ىستەر مينيسترلىگى مەملەكەتتىك ورگانداردىڭ جانە شەتەلدىك سەرىكتەستەردىڭ قولداۋىمەن يزرايل مەن يراننان قازاقستان ازاماتتارىن ەۆاكۋاتسيالاۋدىڭ كەزەكتى كەزەڭىن اياقتادى.
25-ماۋسىمدا قازاقستاننىڭ يزرايل مەن مىسىرداعى ەلشىلىكتەرى 37 ادامدى، سونىڭ ىشىندە قىرعىزستان مەن رەسەيدىڭ 13 ازاماتىن ەۆاكۋاتسيالادى. 26-ماۋسىمدا بۇل توپ «SCAT» اۋە كومپانياسىنىڭ كاير-شىمكەنت باعىتى بويىنشا رەيسىمەن قازاقستانعا امان-ەسەن ورالدى. بۇگىنگى تاڭدا يزرايلدەن ەۆاكۋاتسيالانعانداردىڭ جالپى سانى 103 ادامدى قۇرايدى.
وڭىردەگى احۋال كۇردەلەنگەن ساتتەن باستاپ تەگەران، اشحاباد، باكۋ مەن ەريەۆانداعى ق ر ەلشىلىكتەرىنىڭ قولداۋىمەن يراننان 233 قازاقستان ازاماتى ءساتتى ەۆاكۋاتسيالاندى. ولاردىڭ 135 ءى تۇرىكمەنستان ارقىلى، 25 ءى ازەربايجان ارقىلى، 73 ءى ارمەنيا ارقىلى شىقتى.
بۇدان بولەك، 23-25-ماۋسىم ارالىعىندا اۋە كەڭىستىگىنىڭ ۋاقىتشا جابىلۋىنا بايلانىستى قاتار مەن بىرىككەن اراب امىرلىكتەرىندە بولعان كوپتەگەن قازاقستاندىق ازاماتتار دەر كەزىندە وتانعا ورالا المادى. اتالعان ەلدەردەگى ق ر مەكەمەلەرى تۋىنداعان ماسەلەلەردى رەتتەۋ جانە وتانداستارىمىزدىڭ تەز ارادا ورالۋى ءۇشىن جان-جاقتى كونسۋلدىق-قۇقىقتىق جانە باسقا دا قاجەتتى كومەك كورسەتتى. 24-27-ماۋسىم ارالىعىندا ەلىمىزدىڭ قاتار مەن ب ا ءا- دەگى ديپلوماتيالىق وكىلدىكتەرىنىڭ قولداۋىمەن قازاقستانعا 1900 دەن استام ازامات ورالدى.
ق ر سىرتقى ىستەر مينيسترلىگى يران، يزرايل، تۇرىكمەنستان، مىسىر، ازەربايجان، ارمەنيا، ب ا ءا جانە قاتار بيلىگىنە قازاقستاندىقتاردىڭ ءقاۋىپسىز شىعۋىن قامتاماسىز ەتۋدەگى جەدەل كومەگى مەن سىندارلى ىنتىماقتاستىعى ءۇشىن شىنايى العىس بىلدىرەدى.
قازاقستان س ءى م مەن ەلشىلىكتەرى وڭىردەگى جاعدايدى تاۋلىك بويى باقىلاپ، ازاماتتارىمىزعا قاجەتتى كونسۋلدىق قولداۋ كورسەتۋدى جالعاستىرۋدا. شەت ەلدەردەگى قازاقستاندىقتاردىڭ قۇقىقتارىن، قاۋىپسىزدىگىن جانە اماندىعىن قامتاماسىز ەتۋ ق ر سىرتقى ساياسي ۆەدومستۆوسىنىڭ قىزمەتىندەگى ايرىقشا باسىمدىق بولىپ قالا بەرەدى.
بۇعان دەيىن قازاقستان اۋە كومپانياسى 25-ماۋسىمنان باستاپ تاياۋ شىعىسقا قايتا ۇشاتىنىن جازعانبىز.
