قازاقستان تاريحىنىڭ جاڭا كوپ تومدىعى بيىل دايىن بولادى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ۇلتتىق قۇرىلتايدىڭ 4-وتىرىسى اياسىندا قازاقستان تاريحىنىڭ جاڭا اكادەميالىق باسىلىمىن ازىرلەۋ جۇمىسىنىڭ بارىسى جايىندا ايتتى.

- قۇرىلتاي الاڭىندا مەملەكەت باسشىسى جاڭاا جىلنامالىق 7 تومدى، ۇلتتىق تاريحىمىز جونىندە ۇلكەن ەڭبەكتى جازۋ تۋرالى تاپسىرما بەرگەن ەدى. بيىل وسى جۇمىستى اياقتاۋدى جوسپارلاپ وتىرمىز، - دەدى ساياسات نۇربەك.

اكادەميالىق باسىلىمدى ازىرلەۋگە 5 عىلىمي ينستيتۋت، ەلىمىزدىڭ 250-دەن جانە شەتەلدىڭ 60-تان استام تاريحشى عالىمدارى جۇمىلدىرىلدى. كوپ تومدىققا 40-تان اسا ارحەولوگيالىق زەرتتەۋ ماتەريالدارى، تاريح، ارحەولوگيا جانە ەتنوگرافيا سالالارى بويىنشا 300-گە جۋىق ەڭبەك ەنەدى. ونى دايىنداۋ بارىسىندا حالىقارالىق فورۋمداردىڭ، كوپتەگەن عىلىمي كونفەرەنسيانىڭ، دوڭگەلەك ۇستەلدەر مەن ادىستەمەلىك سەمينارلاردىڭ اياسىندا ارنايى سەكسيالار ءوتتى. وسى ءىس-شارالاردا عىلىمي زەرتتەۋلەردىڭ ناتيجەلەرى تەكسەرىلدى، سونداي-اق عالىمداردان، ساراپشىلاردان جانە مامانداردان ۇسىنىستار الىندى.

بۇعان دەيىن مەملەكەتتىك كەڭەسشى ەرلان قارين الماتى قالاسىنداعى ءا. مارعۇلان اتىنداعى ارحەولوگيا ينستيتۋتىندا «قازاقستان تاريحى: ەجەلگى داۋىردەن بۇگىنگە دەيىن» اتتى جاڭا اكادەميالىق باسىلىمدى ازىرلەپ جاتقان جەتەكشى عالىمدارمەن كەزدەسكەنىن جازعان ەدىك.

اۆتور

مارلان جيەمباي