قازاقستان تاۋ شاڭعىسى تۋريزمىن الەمدىك ستاندارتتارعا ساي دامىتۋعا نيەتتى
استانا. KAZINFORM - پرەمەر-مينيستر ولجاس بەكتەنوۆ PGI Management كومپانياسىنىڭ پرەزيدەنتى دجوان ۆيلادوماتپەن تاۋ شاڭعىسى تۋريزمىن دامىتۋداعى ىنتىماقتاستىق ماسەلەلەرى بويىنشا كەزدەسۋ وتكىزدى. جيىندا الماتى كلاستەرىنە كوڭىل ءبولىندى. بۇل تۋرالى ۇكىمەتتىڭ باسپا ءسوز قىزمەتى حابارلادى.
تۋريزم سالاسىنىڭ جاھاندىق ۇردىستەرى جانە ونىڭ ەلدەر ەكونوميكاسىنىڭ وسۋىنە قوسقان ۇلەسى تالقىلاندى. تاۋ شاڭعىسى باعىتى تاۋلى اۋداندار مەن جالپى ەلىمىزدىڭ الەۋمەتتىك-ەكونوميكالىق دامۋىنىڭ ماڭىزدى قۇرالى ەكەنى ايتىلدى.
دجوان ۆيلادومات تۋريزمگە نازار اۋدارۋدى ەسكەرە وتىرىپ، ءبىرقاتار ەلدىڭ ەكونوميكا قۇرىلىمدارىن ترانسفورماتسيالاۋ بويىنشا جوبالاردى ىسكە اسىرۋ ناتيجەلەرىمەن ءبولىستى. بۇگىنگى تاڭدا كومپانيادا 120 دان استام جوبا بار، وعان داۆوس جانە سەنت-موريتس (شۆەيتساريا)، كۋرشيەۆەل (فرانسيا)، يشگل جانە تيرول (اۋستريا)، ۆەيل جانە اسپەن (ا ق ش)، ۋيستلەر-بلەككومب (كانادا) سياقتى قىسقى تۋريستىك برەندتەر، سونداي-اق وتكەن جىلى كەلۋشىلەر سانى 9,6 ميلليون ادامدى قۇراعان، 80 مىڭ حالقى بار اندوررا كۋرورتتارى كىرەدى. 60 جىلدان استام ۋاقىت بويى كومپانيا تاۋ شاڭعىسى كەشەندەرىن دامىتۋدا الەمدىك كوشباسشىعا اينالدى.
تاراپتار الماتى تاۋ كلاستەرىن بىرلەسىپ دامىتۋ كەلەشەگىن قاراستىردى. بۇگىنگى تاڭدا تۋريستىك اعىن جىلىنا 2 ميلليون ادامدى قۇرايدى، جالپى ماۋسىمدىق 2 مىڭ جۇمىس ورنى اشىلدى. جالپى ۇزىندىعى 41 شاقىرىم جانە 16 كوتەرگىش تراسسادان تۇراتىن قولدانىستاعى ينفراقۇرىلىم كۇنىنە 6 مىڭ ادامدى قامتاماسىز ەتۋگە مۇمكىندىك بەرەدى. بۇل رەتتە وتاندىق جانە شەتەلدىك تۋريستەر تاراپىنان سۇرانىستىڭ ارتۋى ماۋسىمدىق تۋريستىك دەستيناتسيا رەتىندە تاۋ شاڭعىسى تۋريزمىن دامىتۋدىڭ مەملەكەتتىك ستراتەگياسىن ودان ءارى جەتىلدىرۋدى تالاپ ەتەدى. تالداۋ ناتيجەسىنە سايكەس، تراسسالار ۇزىندىعىن 227 شاقىرىمعا، كوتەرگىشتەر سانىن 58-گە دەيىن ارتتىرۋ ارقىلى كلاستەر ينفراقۇرىلىمىن دامىتۋ اعىمداعى وتكىزۋ قابىلەتىن 5,6 ەسەگە، كۇنىنە 34 مىڭ ادامعا دەيىن جەتكىزۋگە، 10 مىڭ تىكەلەي جۇمىس ورنىن اشۋعا مۇمكىندىك بەرەدى. وسىلايشا، 2029 -جىلعا قاراي الماتى تاۋ كلاستەرى جىلىنا 7,5 ميلليونعا دەيىن تۋريست قابىلداي الادى. سونىمەن قاتار ەنشىلەس جانە سەرۆيستىك ەكونوميكانىڭ دامۋىنا تۇراقتى اسەر كۇتىلۋدە.
ينكليۋزيا دا ماڭىزدى سالا رەتىندە اتالدى. ينفراقۇرىلىمدى جاڭعىرتۋ بالالاردىڭ قىسقى سپورت تۇرلەرىن مەڭگەرۋى جانە وتباسىلىق بوس ۋاقىتىن ۇيىمداستىرۋ ءۇشىن ءبىلىم بەرۋ باعدارلامالارىن كەڭىنەن دامىتۋعا مۇمكىندىك بەرەدى.
پرەمەر-مينيستر قازىرگى جاھاندىق ەكونوميكالىق جاعدايدا ءارتاراپتاندىرۋعا باسىمدىق بەرىلگەنىن اتاپ ءوتتى. تۋريزم وڭدەۋ ونەركاسىبى جانە تسيفرلاندىرۋ، كولىك جانە لوگيستيكا سياقتى سالالارمەن قاتار ەكونوميكالىق ءوسۋدىڭ جاڭا نۇكتەسى بولۋعا ءتيىس.
كەزدەسۋ قورىتىندىسى بويىنشا قاتىسۋشىلار حالىقارالىق ستاندارتتارعا بەيىمدەلگەن ينفراقۇرىلىمدى جاڭعىرتۋ بويىنشا بىرلەسكەن جۇمىس جاساۋعا نيەت ءبىلدىردى.
