قازاقستان ت م د- نىڭ سالىقتىق تەرگەۋ ورگاندارى باسشىلارىنىڭ ۇيلەستىرۋ كەڭەسىنە ءتوراعالىق ەتەدى
استانا. KAZINFORM - الماتى قالاسىندا تمد ەلدەرىنىڭ سالىقتىق (قارجىلىق) تەرگەۋ ورگاندارى باسشىلارىنىڭ ۇيلەستىرۋ كەڭەسىنىڭ (ستوبۇك) 23-وتىرىسى ءوتتى.
وتىرىسقا ءازىربايجان، ارمەنيا، بەلارۋس، قىرعىزستان، رەسەي، تاجىكستان مەن وزبەكستاننىڭ سالىقتىق (قارجىلىق) تەرگەۋ ورگاندارىنىڭ باسشىلارى قاتىستى.
سونىمەن قاتار جيىنعا ت م د اتقارۋشى كوميتەتىنىڭ باس حاتشىسىنىڭ ورىنباسارى نۇرلان سەيتيموۆ باسشىلىعىمەن دەلەگاتسيا قاتىستى.
جيىندى قارجىلىق مونيتورينگ اگەنتتىگىنىڭ ءتوراعاسى جانات ەليمانوۆ اشتى.
كەڭەس وتىرىسىندا ءتوراعالىقتىڭ بەلارۋستەن قازاقستانعا اۋىساتىنى جاريالاندى.
ستوبۇك ءتوراعاسى بولىپ ق ر ق م ا ءتوراعاسىنىڭ ورىنباسارى قايرات بيجانوۆ، ال تەڭ ءتوراعالار رەتىندە سالىقتىق (قارجىلىق) تەرگەۋ ورگاندارىنىڭ باسشىلارى بەلارۋس رەسپۋبليكاسىنان اندرەي سامبۋك پەن ارمەنيا رەسپۋبليكاسىنان ۆاان چارحيفالاكيان سايلاندى.
قاتىسۋشىلار ت م د مەملەكەتتەرىنىڭ سالىقتىق تەرگەۋ ورگاندارىنىڭ ەكونوميكالىق قاۋىپسىزدىكتى قامتاماسىز ەتۋ قىزمەتىن جانە الداعى كەزەڭگە ارنالعان جۇمىس جوسپارلارىن تالقىلادى.
باسقوسۋدا ۆەدومستۆوارالىق ءوزارا ءىس- قيمىل مەحانيزمدەرى جانە ەكونوميكالىق قۇقىق بۇزۋشىلىقتارمەن، سونىڭ ىشىندە زاڭسىز اقشا اينالىمى، زاڭسىز ويىن بيزنەسىمەن كۇرەس سالاسىنداعى ىنتىماقتاستىقتى نىعايتۋ ماسەلەلەرى قارالدى.
دەلەگاتسيا باسشىلارى سيفرلىق اكتيۆتەردى، كريپتوۆاليۋتالاردى پايدالانۋ ارقىلى جاسالاتىن قىلمىستارعا، سونداي-اق ينتەرنەت-الاياقتىققا، قارجىلىق پيراميدالارعا جانە دروپپەرلەرگە قارسى كۇرەس بويىنشا تاجىريبەلەرىمەن ءبولىستى.
كەڭەس مۇشەلەرى ءۇشىن كۇن تارتىبىندەگى ەرەكشە ماسەلە ەكسترەميزم مەن تەرروريزمدى قارجىلاندىرۋعا بايلانىستى قىلمىستارمەن كۇرەس بويىنشا قابىلدانىپ جاتقان شارالاردى جانە ىنتىماقتاستىقتى تالقىلاۋ بولدى.
سونىمەن قاتار، تاراپتار كەڭەسكە قاتىسۋشى ەلدەردەگى كادرلىق قىزمەتكەرلەردىڭ ءبىلىمىن جانە كاسىبي داعدىلارىن ارتتىرۋ ماسەلەلەرىنە ەرەكشە نازار اۋداردى.
جاڭادان سايلانعان ءتوراعا قايرات بيجانوۆ قازاقستان كەڭەس الدىنا قويىلعان مىندەتتەردى ورىنداۋ ءۇشىن بار كۇش-جىگەرىن سالاتىنىن جانە ىنتىماقتاستىقتىڭ باسىم باعىتتارىن بارىنشا ءتيىمدى جۇزەگە اسىرۋعا ۇمتىلاتىنىنىن اتاپ ءوتتى.
اۆتور
ەربول جانات
