قازاقستان سپورتىنداعى تانىمال ەگىزدەر

استانا. KAZINFORM - قازاقتا «بىرگە تۋماق بولسا دا، بىرگە جۇرمەك جوق» دەگەن ءسوز بار. دەگەنمەن ەلىمىزدە بۇل ءسوزدى جوققا شىعارىپ جۇرگەن ەگىز سپورتشىلار از ەمەس.

تۋريزم جانە سپورت مينيسترلىگى ءبىر سپورت تۇرىمەن شۇعىلدانىپ، بايراقتى باسەكەدە ەل قورجىنىنا جۇلدە سالىپ جۇرگەن ساڭلاقتار ءتىزىمىن جاساعان.

وسى ورايدا نازارلارىڭىزعا ەلىمىزدەگى ەگىز سپورتشىلاردىڭ ءبىر بولىگىن ۇسىنۋدى ءجون كوردىك.

ايبەك جانە نۇربەك ورالبايلار (بوكس)

سپورت ۇيىرمەسىنە بوكسپەن ەمەس، كۇرەسپەن شۇعىلدانامىز دەپ كەلگەن ەگىزدەر بۇگىندە تەك ەلىمىزدە عانا ەمەس، الەمدە دە ءوز سالماعىنىڭ ۇزدىك بوكسشىلارى. 80 كەلى سالماقتا جۇدىرىقتاساتىن نۇربەك ورالباي جۋىردا پاريج وليمپياداسىنىڭ كۇمىس جۇلدەگەرى اتاندى. سونىمەن قاتار ول جاستار مەن ەرەسەكتەر اراسىنداعى الەم چەمپيونى، ازيا بىرىنشىلىگىنىڭ قولا جۇلدەگەرى.

بيىل 92+ كەلى سالماققا اۋىسقان ەگىزدىڭ سىڭارى ايبەك 2018-جىلعى جاس وسپىرىمدەر ساناتىنداعى وليمپيا ويىندارىنىڭ جەڭىمپازى، ازيا چەمپيونى جانە جاستار اراسىنداعى الەم چەمپيوناتىنىڭ كۇمىس جۇلدەگەرى.

ءجاميلا جانە ءمادينا باقبەرگەنوۆالار (ايەلدەر كۇرەسى)

ءجاميلا مەن ءمادينا باقبەرگەنوۆالار - ەلىمىزدىڭ كۇرەس تۇرلەرى تاريحىندا قازاق قىزدارى اراسىندا ەڭ كوپ جۇلدەگە قول جەتكىزگەن سپورتشىلار. ءجاميلانىڭ ەنشىسىندە الەم چەمپيوناتىنىڭ ءۇش جۇلدەسى، ازيا بىرىنشىلىگىنىڭ بەس مەدالى بار. بۇدان بولەك، ول ازيا ويىندارى، يسلام ىنتىماقتاستىق ويىندارى، جاس وسپىرىمدەر مەن 23 جاسقا دەيىنگى الەم چەمپيوناتىندا جۇلدە العان.

ءمادينانىڭ دا بوزكىلەمدەگى جەتىستىگى از ەمەس. ول ازيا بىرىنشىلىگىندە ءۇش رەت تۇعىر ساتىسىنا كوتەرىلىپ، 23 جاسقا دەيىنگى الەم جانە ازيا چەمپيوناتىندا جۇلدەگەر اتاندى.

عۇسمان جانە عۇمار قىرعىزبايەۆتار (دزيۋدو)

بيىل قازاقستاندىق دزيۋدوشىلار حالىقارالىق ارەنادا ۇزدىك ناتيجە كورسەتتى. وليمپيادادا ولجا سالىپ، شەتەلدەگى جارىستاردا دا جەڭىمپاز اتاندى. سولاردىڭ قاتارىندا پاريج وليمپياداسىنىڭ - قولا، الەم جانە ازيا بىرىنشىلىكتەرىنىڭ جۇلدەگەرى عۇسمان قىرعىزبايەۆ تا بار. عۇسماننىڭ سىڭارى عۇمار دا دزيۋدوشى. ول الەمدىك گران-پري كەزەڭىندە جانە اسكەري قىزمەتشىلەر اراسىنداعى الەم چەمپيوناتىنىڭ قولا جۇلدەسىن العان. سونىمەن قاتار ىشكى چەمپيوناتتا دا ۇزدىكتەر قاتارىنان كورىنىپ ءجۇردى.

الينا جانە كريستينا شۋمەكوۆالار (كونكيمەن جۇگىرۋ)

جاستىعىنا قاراماي، اپالى-ءسىڭلىلى شۋمەكوۆالار حالىقارالىق جارىستاردا ءساتتى ونەر كورسەتىپ ءجۇر. كونكيمەن جۇگىرۋ سپورتىنان ق ر سپورت شەبەرى كريستينا بيىل وڭتۇستىك كورەيادا ۇيىمداستىرىلعان جاس وسپىرىمدەر اراسىنداعى وليمپيادادا تۋ ۇستاۋشى بولدى. سونداي-اق ول ءوز جاس ساناتىنداعى ەل جانە الەم كۋبوگىنىڭ كۇمىس جۇلدەگەرى. الينا مەن كريستينا كوماندالىق سايىستاردا دا ەل قورجىنىنا بىرنەشە جۇلدە سالدى.

فاتيما جانە زۋحرا يرنازاروۆالار (نىسانا كوزدەۋ)

نىسانا كوزدەۋدەن قازاقستان ايەلدەر قۇراماسىنىڭ سپورتشىلارى فاتيما مەن زۋحرا حالىقارالىق جارىستاردا ۇزدىك ناتيجەلەرىمەن كوزگە ءتۇسىپ ءجۇر. ولار يۋنيورلار اراسىنداعى الەم چەمپيوناتىندا ءبىر التىن (فاتيما) جانە ءبىر قولا (زۋحرا) مەدال، ازيا ويىندارىندا كوماندالىق سايىستا كۇمىس جۇلدە جەڭىپ السا، جەكەلەي سىندا زۋحرا التىننان القا تاقتى. فاتيما 2019-جىلعى ازيا چەمپيوناتىندا ۇزدىك شىققان.