قازاقستان پرەزيدەنتىنىڭ اتىنا رەسپۋبليكا كۇنىنە وراي كەلىپ تۇسكەن قۇتتىقتاۋ جەدەلحاتتارى
استانا. KAZINFORM - قاسىم-جومارت توقايەۆتىڭ اتىنا ۇلتتىق مەرەكە - رەسپۋبليكا كۇنىنە وراي شەت مەملەكەتتەردىڭ باسشىلارى مەن حالىقارالىق ۇيىمداردىڭ جەتەكشىلەرىنەن قۇتتىقتاۋ حاتتارى كەلىپ جاتىر.
رەسەي فەدەراتسياسىنىڭ پرەزيدەنتى ۆلاديمير پۋتين جەدەلحاتىندا ەكى ەل اراسىنداعى قارىم-قاتىناس ستراتەگيالىق سەرىكتەستىك جانە وداقتاستىق رۋحىندا تابىستى دامىپ جاتقانىنا، سونداي-اق ماسكەۋ مەن استانا ءتۇرلى كوپجاقتى قۇرىلىمدار اياسىندا بەلسەندى بايلانىس ورناتقانىنا توقتالدى.
- بىرلەسكەن كۇش- جىگەرىمىز ارقىلى حالىقتارىمىزدىڭ يگىلىگى جانە ەۋرازيا كەڭىستىگىندەگى قاۋىپسىزدىك پەن تۇراقتىلىقتى نىعايتۋ جولىندا ەكىجاقتى ىنتىماقتاستىقتىڭ بارلىق باعىتىن ودان ءارى جانداندىرا تۇسەتىنىمىزگە سەنىمدىمىن، - دەپ جازدى ۆلاديمير پۋتين.
قىتاي حالىق رەسپۋبليكاسىنىڭ ءتوراعاسى شي جينپيڭ قازاقستاننىڭ وڭىرلىك جانە حالىقارالىق دەڭگەيدە ىقپالى ارتا تۇسكەنىن اتاپ ءوتىپ، بۇل جەتىستىكتەرگە تاتۋ كورشى، جان- جاقتى ستراتەگيالىق سەرىكتەس رەتىندە ءوز حالقىنىڭ شىنايى قۋاناتىنىن ايتتى.
- ەكى ەل اراسىنداعى ءوزارا ءتيىمدى سەرىكتەستىكتى ودان ءارى ىلگەرىلەتۋ جانە ىقپالداستىقتى جاڭا دەڭگەيگە كوتەرۋ ءۇشىن سىزبەن كۇش- جىگەر بىرىكتىرۋگە دايىنمىن، - دەپ جازىلعان قحر ءتوراعاسىنىڭ جەدەلحاتىندا.
امەريكا قۇراما شتاتتارىنىڭ پرەزيدەنتى دجوزەف بايدەن قاسىم-جومارت توقايەۆ پەن قازاقستان حالقىنا جولداعان قۇتتىقتاۋ جەدەلحاتىندا ەلدەرىمىز اراسىنداعى ستراتەگيالىق سەرىكتەستىك تاۋەلسىزدىك، اۋماقتىق تۇتاستىق سياقتى بىرىككەن ۇلتتار ۇيىمىنىڭ قاعيداتتارىنا نەگىزدەلگەنىنە نازار اۋدارعان.
- اتالعان قاعيداتتاردى بەرىك ۇستانعان قازاقستانمەن قاۋىپسىزدىك، ەكونوميكا جانە ەكولوگيا ماسەلەلەرىن شەشۋ جولىنداعى بىرلەسكەن جۇمىستى جالعاستىرۋعا مۇددەلىمىز، - دەپ جازدى دجوزەف بايدەن.
ۇلى بريتانيا مەن سولتۇستىك يرلانديا بىرىككەن كورولدىگىنىڭ كورولى III چارلز قازاقستانمەن ىقپالداستىقتى جوعارى باعالاپ، ەلدەرىمىز بەيبىتشىلىك، قورشاعان ورتانى قورعاۋ، كليماتتىڭ وزگەرۋى سياقتى جاھاندىق ماڭىزدى ماسەلەلەر بويىنشا ورناتقان تىعىز بايلانىستى جالعاستىراتىنىنا سەنىم ءبىلدىردى.
فرانسيا پرەزيدەنتى ەممانيۋەل ماكرون ءوزىنىڭ قۇتتىقتاۋىندا ەكى ەلدى كوپجاقتى ىنتىماقتاستىق بىرىكتىرەتىنىن ايتتى.
- ءبىز ءتۇرلى قۇرىلىمدار اياسىنداعى بايلانىسىمىزدى بەكىتىپ، سەرىكتەستىگىمىزدىڭ كوكجيەگىن كەڭەيتە تۇسەمىز دەپ ۇمىتتەنەمىن، - دەپ جازعان فرانسيا پرەزيدەنتى.
تۇركيا پرەزيدەنتى رەجەپ تايپ ەردوعان باۋىرلاس حالىقتار اراسىنداعى قارىم-قاتىناس ورتاق ءتىلىمىز بەن تاريحىمىزدان جانە مادەنيەتىمىزدەن قۋات الا وتىرىپ، ودان ءارى تەرەڭدەي تۇسەتىنىنە كامىل سەنەتىنىن اتاپ وتكەن.
- قازاقستاننىڭ تۇركى الەمىنىڭ بىرلىگىنە ەرەكشە ءمان بەرۋىن جانە تۇركى مەملەكەتتەرى ۇيىمىن نىعايتۋداعى جەتەكشى ءرولىن جوعارى باعالايمىز، - دەلىنگەن تۇركيا پرەزيدەنتىنىڭ جەدەلحاتىندا.
وزبەكستان پرەزيدەنتى شاۆكات ميرزيەيەۆ ءوز قۇتتىقتاۋىندا قازاقستاندا اۋقىمدى وزگەرىستەر ورىن الىپ، مەملەكەت پەن قوعام ءومىرىنىڭ بارلىق سالاسىندا كەشەندى ءارى جۇيەلى رەفورمالار جۇرگىزىلىپ جاتقانىن جانە ەلدىڭ حالىقارالىق ارەناداعى ابىروي- بەدەلى ارتا تۇسكەنىن ايتقان.
قىرعىزستان پرەزيدەنتى سادىر جاپاروۆ تاۋەلسىز ەل بولعان ساتتەن باستاپ باۋىرلاس قازاقستان مەملەكەتتىڭ ىرگەسىن نىعايتۋ، ساياسي جانە الەۋمەتتىك-ەكونوميكالىق تۇرعىدان دامۋ، بەلسەندى سىرتقى ساياسات جۇرگىزۋ ىسىندە ايتارلىقتاي تابىسقا قول جەتكىزگەنىنە توقتالعان. سونداي-اق ەكى ەل اراسىنداعى ىنتىماقتاستىق ودان ءارى دامي بەرەتىنىنە سەنىم بىلدىرگەن.
تاجىكستان پرەزيدەنتى ەمومالي راحمون ستراتەگيالىق سەرىكتەستىك پەن وداقتاستىق قاعيداتتارىنا نەگىزدەلگەن دوستىق پەن ءوزارا ءتيىمدى بايلانىستاردى ودان ءارى نىعايتۋعا دايىن ەكەنىن مالىمدەگەن.
تۇرىكمەنستان پرەزيدەنتى سەردار بەردىمۇحامەدوۆ تۇرىكمەن- قازاق ىقپالداستىعى كوپتەگەن باعىتتا جاندانىپ كەلە جاتقانىنا باسا ءمان بەرىپ، وعان جوعارى دەڭگەيدەگى اشىق ءارى دوستىق ديالوگ وڭ اسەر ەتىپ وتىرعانىن جازعان. ەلىمىزدىڭ ۇلتتىق مەرەكەسىنە وراي جىلى لەبىزىن تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ تە جولدادى.
ازەربايجان پرەزيدەنتى يلحام الييەۆ جەدەلحاتىندا ءوز ەلىنىڭ قازاقستانمەن ساۋدا- ەكونوميكالىق، مادەني- گۋمانيتارلىق سالالاردا ناتيجەلى سەرىكتەستىكتى دامىتۋعا جانە بىرلەسكەن جوبالاردى جۇزەگە اسىرۋعا نيەتتى ەكەنىن جەتكىزدى.
سونىمەن قاتار قۇتتىقتاۋ جەدەلحاتتارىن قوس كيەنىڭ ساقشىسى، ساۋد ارابياسىنىڭ كورولى سالمان بەن ابدەلازيز ءال ساۋد، ساۋد ارابياسىنىڭ تاق مۇراگەرى، پرەمەر-ءمينيسترى مۇحاممەد بەن سالمان بەن ابدەلازيز ءال ساۋد، ريم پاپاسى فرانسيسك، جاپونيا يمپەراتورى نارۋحيتو، ماروككو كورولى VI مۇحاممەد، باحرەين كورولى حاماد بەن يسا ءال حاليفا، ومان سۇلتانى حايسام بەن تاريق، نيدەرلاند كورولى ۆيللەم- الەكساندر، بەلگيا كورولى فيليپپ، شۆەتسيا كورولى كارل گۋستاۆ، يسپانيا كورولى VI فەليپە، تايلاند كورولى ماحا ۆاچيرالونگكورن، گەرمانيانىڭ فەدەرالدىق پرەزيدەنتى فرانك-ۆالتەر شتاينمايەر، ءۇندىستان پرەزيدەنتى دراۋپادي مۋرمۋ، كورەيا رەسپۋبليكاسىنىڭ پرەزيدەنتى يۋن سوك يەل، بەلارۋس پرەزيدەنتى الەكساندر لۋكاشەنكو، يتاليا پرەزيدەنتى سەردجو ماتتارەللا، شۆەيتساريا پرەزيدەنتى ۆيولا امحەرد، چەحيا پرەزيدەنتى پەتر پاۆەل، سلوۆاكيا پرەزيدەنتى پەتەر پەللەگريني، پورتۋگاليا پرەزيدەنتى مارسەلۋ رەبەلۋ دە سوزا، يران پرەزيدەنتى ماسۋد پەزەشكيان، ءباا پرەزيدەنتى شەيح مۇحاممەد بەن زايد ءال ناحايان، مىسىر پرەزيدەنتى ابدەل فاتتاح اس-سيسي، يندونەزيا پرەزيدەنتى پرابوۆو سۋبيانتو، پالەستينا پرەزيدەنتى ماحمۋد ابباس، سينگاپۋر پرەزيدەنتى تارمان شانمۋگاراتنام، اۋستريا پرەزيدەنتى الەكساندر ۆان دەر بەللەن، فينليانديا پرەزيدەنتى الەكساندر ستۋبب، حورۆاتيا پرەزيدەنتى زوران ميلانوۆيچ، بولگاريا پرەزيدەنتى رۋمەن راديەۆ، ماجارستان پرەمەر- ءمينيسترى ۆيكتور وربان، ارمەنيا پرەمەر-ءمينيسترى نيكول پاشينيان، ارمەنيا پرەزيدەنتى ۆااگن حاچاتۋريان، ليتۆا پرەزيدەنتى گيتاناس ناۋسەدا، لاتۆيا پرەزيدەنتى ەدگارس رينكيەۆيچس، ەستونيا پرەزيدەنتى الار كاريس، البانيا پرەزيدەنتى بايرام بەگاي، يزرايل پرەزيدەنتى يتسحاك گەرتسوگ، ۆەتنام پرەزيدەنتى كىونگ لىونگ، رۋمىنيا پرەزيدەنتى كلاۋس ۆەرنەر يوحاننيس، كيپر پرەزيدەنتى نيكوس حريستودۋليديس، وڭتۇستىك افريكا رەسپۋبليكاسىنىڭ پرەزيدەنتى ماتامەلا سيريل رامافوسا، سەربيا پرەزيدەنتى الەكساندر ۆۋچيچ، يراك پرەمەر-ءمينيسترى مۇحاممەد شيا ءال-سۋداني، ب ا ءا ۆيتسە-پرەزيدەنتى، پرەمەر-ءمينيسترى، دۋباي ءامىرشىسى شەيح مۇحاممەد بەن راشيد ءال ماكتۋم، ب ا ءا ۆيتسە-پرەزيدەنتى، پرەمەر- ءمينيستردىڭ ورىنباسارى، پرەزيدەنت اكىمشىلىگىنىڭ باسشىسى شەيح مانسۇر بەن زايد ءال ناحايان، كانادانىڭ گەنەرال گۋبەرناتورى مەري سايمون، ەۋروپالىق كەڭەستىڭ پرەزيدەنتى شارل ميشەل، شاڭحاي ىنتىماقتاستىق ۇيىمىنىڭ باس حاتشىسى جان مين، تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىراليەۆ، تاتارستان رايسى رۋستام ميننيحانوۆ جانە باسقالارى جولدادى.
قۇتتىقتاۋ جەدەلحاتتارى ءالى دە كەلىپ ءتۇسىپ جاتىر.
