قازاقستان پرەزيدەنتى مەن ابۋ دابيدىڭ تاق مۇراگەرى استاناداعى مەكتەپ-ليتسەيگە باردى
استانا. KAZINFORM - قازاقستان پرەزيدەنتى مەن ابۋ ءدابيدىڭ تاق مۇراگەرى شەيح حاليف بەن زايد ءال ناحايان اتىنداعى №84 مەكتەپ-ليتسەيگە باردى. بۇل تۋرالى اقوردانىڭ باسپا ءسوز قىزمەتى حابارلادى.
مارتەبەلى مەيماندارعا قازىرگى كەزدە وقۋ وشاعىندا 2800 بالا ءبىلىم الىپ، 159 پەداگوگ ەڭبەك ەتەتىنى جونىندە اقپارات بەرىلدى. بيىلعى وقۋ جىلىندا «سيفرلى مەكتەپ» جوباسى دايىندالىپ، جاراتىلىستانۋ جانە ماتەماتيكا پاندەرى 7 باعىتتا، اتاپ ايتقاندا، IT STEM ،FAB LAB، روبوتتى تەحنيكا، قولدانبالى ماتەماتيكا، بيوينجەنەريا، ماتەماتيكالىق مودەلدەۋ، بيوحيميا سالالارىنا ءبولىپ وقىتىلدى.
قاسىم-جومارت توقايەۆ پەن شەيح حالەد بەن مۇحاممەد بەن زايد ءال ناحايان اراب ءتىلى كابينەتىن كوردى. مەكتەپ وقۋشىلارى اراب ءتىلى مەن ادەبيەتىن مەڭگەرۋدە جەتكەن جەتىستىكتەرىن تانىتتى.
وقۋشىلار قازاقستان پرەزيدەنتى مەن ابۋ ءدابيدىڭ تاق مۇراگەرىنە مەكتەپ مۋزەيىن تانىستىردى. وندا ەكى ەلدىڭ ىنتىماقتاستىعى مەن دوستىعىنا ارنالعان كورمە ۇيىمداستىرىلعان.
ەكسپوزيتسياعا ەجەلگى داۋىردەن بۇگىنگە دەيىنگى اراب الەمى جونىندە سىر شەرتەتىن كىتاپتار، ۇلتتىق كيىم ۇلگىلەرى مەن تاريحي جادىگەرلەر قويىلعان.
ايتا كەتەيىك، مەملەكەت باسشىسى ابۋ ءدابيدىڭ تاق مۇراگەرى حالەد بەن مۇحاممەد ءال ناحايانمەن كەلىسسوز جۇرگىزدى.
اۆتور
ەلميرا ورالبايەۆا
