قازاقستان رەسەي كانالىنان سۋ العانى ءۇشىن 5 ميلليارد تەڭگە تولەپ وتىر

استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ماجىلىستەگى ۇكىمەت ساعاتىنان كەيىن وتكەن باسپا ءسوز ءماسليحاتىندا ساراتوۆ كانالىنان سۋ الۋ قازاقستان بيۋدجەتىنە قانداي سالماق سالعانىن ايتتى.

- باتىس قازاقستان وبلىسىنىڭ قازتالوۆ، جانعالى اۋداندارىنا رەسەيدىڭ ساراتوۆ كانالىنان سۋ الىپ، ول ءۇشىن اقى تولەپ وتىر. ال ءسىز جاڭا رەسەيگە سۋ ءۇشىن ەشقانداي اقشا تولەمەيتىنىمىزدى ايتتىڭىز؟ سولاي بولسا، بۇل اۋداندارعا رەسەي سۋدى تەگىن بەرىپ وتىر ما، - دەپ سۇرادى جۋرناليست.

مينيستر اتالعان اۋداندارعا رەسەيدەن سۋ العانى ءۇشىن بيۋدجەت قاراجاتى جۇمسالاتىنىن راستادى. ءبىراق ول اقشا سۋدىڭ وزىنە ەمەس، تاسىمال شىعىندارىنا تولەنەتىنىن ناقتىلادى.

- بۇل جەردە رەسەيگە سۋدىڭ اقىسىنا اقشا تولەپ وتىرعان جوقپىز. كانالدان سۋدى ايداپ جەتكىزۋ ءۇشىن ەلەكتر قۋاتى جۇمسالادى. سول جۇمسالعان توقتىڭ قۇنىن تولەيمىز. ونىڭ كولەمى جىلىنا 5 ميلليارد تەڭگە، - دەدى مينيستر.

ايتا كەتۋ كەرەك، كاسپي ماسەلەسىن شەشۋ اياسىندا قازاقستان رەسەيگە ەدىل سۋىن بىرلەسىپ رەتتەۋ تۋرالى ۇسىنىس جاساماقشى.

اۆتور

ەسىمجان ناقتىباي