قازاقستان قىتايلىق تۋريستەر اراسىندا تانىمال ەلدەر تىزىمىندە 29-ورىنعا كوتەرىلدى
استانا. KAZINFORM - قازاقستان قىتايلىق تۋريستەر اراسىندا تانىمال ەلدەر تىزىمىندە 29-ورىنعا كوتەرىلدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە تۋريزم جانە سپورت مينيسترلىگى تۋريزم يندۋسترياسى كوميتەتىنىڭ ءتوراعاسى نۇرتاس كارىپبايەۆ ايتتى.
- مەملەكەت باسشىسى قاسىم-جومارت توقايەۆتىڭ قىتايعا رەسمي ساپارى بارىسىندا 2024-جىل «قىتايداعى قازاقستان تۋريزمى جىلى» بولىپ جاريالانعان بولاتىن. تۋريزم جىلى اياسىنداعى ءىس-شارالار ساياحاتشىلارعا جاڭا مۇمكىندىك بەردى. سونداي-اق تۋريزم يندۋسترياسى وكىلدەرىنە سەرىكتەستىك بايلانىستاردى نىعايتۋعا جول اشتى. تۋريزم جىلىنىڭ نەگىزگى ماقساتى - قازاقستاندى قىتاي ازاماتتارى ءۇشىن تۋريستىك دەستيناتسيا رەتىندە تانىمال ەتۋ. سونداي-اق مادەني جانە ىسكەرلىك تاجىريبە الماسۋ، حالىقتار اراسىنداعى ءوزارا تۇسىنىستىك پەن دوستىقتى نىعايتۋ. تۋريزم جىلى قىتايدان جارتى ميلليون تۋريست تارتۋعا جانە 300 ميلليون ا ق ش دوللارى كولەمىندەگى تۋريستىك قىزمەتتەردى ەكسپورتتاۋعا باعىتتالدى، - دەدى كوميتەت ءتوراعاسى.
ونىڭ اتاپ وتۋىنشە، مينيسترلىك تۋريزم جىلىنىڭ ءبىرىڭعاي جوسپارىن بەكىتتى. جوسپار بىرنەشە باعىتتى قامتيتىن ءىس-شارالاردان تۇردى. جىل ىشىندە ماركەتينگتىك قۇرالداردى پايدالانۋ، ونىڭ ىشىندە ءتۇرلى كەزدەسۋلەر، ىسكەرلىك جانە مادەني ءىس-شارالار وتكىزۋ ارقىلى 37 ءىس-شارا ۇيىمداستىرىلدى. بۇلاردىڭ ءبارى قىتاي نارىعىندا قازاقستاننىڭ تانىمالدىلىعىن ارتتىرۋعا باعىتتالعان.
- ءىس-شارالاردىڭ بارلىعى قىتايدىڭ جەتەكشى تۋريستىك كومپانيالارىمەن ىسكەرلىك بايلانىستاردى نىعايتۋعا ارنالدى. وسىلايشا، ىستەلگەن جۇمىستاردىڭ ناتيجەسىندە بروندالعان ساپارلار سانى بويىنشا قازاقستان قىتايلىق تۋريستەر اراسىندا تانىمال ەلدەر تىزىمىندە 40 تان 29-ورىنعا كوتەرىلدى، - دەدى نۇرتاس كارىپبايەۆ.
بۇعان دەيىن قىتايداعى قازاقستان ءتۋريزمى جىلى ىشكى تۋريزمگە قانداي سەرپىن بەرگەنىن جازعان ەدىك.
