قازاقستان قىتاي مەن برازيليانىڭ ۋكرايناعا قاتىستى بەيبىتشىلىك جوسپارىن قولدايدى
استانا. KAZINFORM - قازاقستان قىتاي مەن برازيليانىڭ ۋكرايناعا قاتىستى بەيبىتشىلىك جوسپارىن قولدايدى. بۇل تۋرالى مەملەكەت باسشىسى قاسىم-جومارت توقايەۆ بريكس-ءتىڭ XVI سامميتى پلەنارلىق وتىرىسىنىڭ «بريكس+» /«اۋتريچ» فورماتىنداعى جيىنىندا ايتتى.
«بريكس دامۋ ءۇشىن وراسان زور الەۋەتكە يە جانە ءارتۇرلى قۇرلىقتاعى مەملەكەتتەردى بىرىكتىرىپ، ىنتىماقتاستىقتى نىعايتادى، بارلىق قاتىسۋشىلاردىڭ يگىلىگى ءۇشىن بىرلەسكەن مۇمكىندىكتەردى ءتيىمدى پايدالانادى. بريكس- ءتىڭ ورتاق گۇلدەنۋ، ءوزارا قۇرمەت پەن سەرىكتەستىك قاعيداتتارىنا نەگىزدەلگەن بولاشاقتى قۇرۋ ءۇشىن رەسۋرستارى دا، تاجىريبەسى دە بار. قازاقستان ءۇشىن بريكس- كە مۇشە ءاربىر مەملەكەتپەن شىنايى دوستىق قارىم- قاتىناستا بولۋى وتە ماڭىزدى. بريكس- ءتىڭ كوپجاقتى كۇش-جىگەرى اجىراماس جانە امبەباپ قۇرىلىم بولىپ قالا بەرەتىن ب ۇ ۇ قىزمەتىن ۇيلەسىمدى تۇردە تولىقتىراتىنى ءسوزسىز. بىرىككەن ۇلتتار ۇيىمىنىڭ جارعىسىندا بەكىتىلگەن ديپلوماتيا مەن ديالوگ پرينتسيپتەرى قاقتىعىستاردى بەيبىت جولمەن شەشۋگە جانە ستراتەگيالىق تۇراقتىلىقتى نىعايتۋعا ىقپال ەتەتىن بريكس كۇنتارتىبىنىڭ نەگىزىنە اينالدى»، - دەدى مەملەكەت باسشىسى.
قاسىم-جومارت توقايەۆ قازاقستان رەسەيدىڭ ءوزارا سەنىم مەن ىنتىماقتاستىقتى نىعايتۋ ارقىلى گەوساياسي شيەلەنىستى ازايتۋعا باعىتتالعان ەۋرازيادا تەڭ جانە بولىنبەيتىن قاۋىپسىزدىكتى قۇرۋ تۇجىرىمداماسىن جوعارى باعالايتىندىعىن ايتتى.
«قازاقستان قىتايدىڭ حالىقارالىق تۇراقتىلىقتى ساقتاۋعا، ەگەمەندىكتى قورعاۋعا، كوپجاقتى تاسىلدەردى قولدانۋعا جانە جانجالداردى بەيبىت جولمەن شەشۋگە باعىتتالعان جاھاندىق قاۋىپسىزدىك باستاماسىن قولدايدى. قازاقستان قىتاي مەن برازيليانىڭ ۋكرايناعا قاتىستى بەيبىتشىلىك جوسپارىن جالپى قولدايدى»، - دەدى پرەزيدەنت.
ەستەرىڭىزگە سالا كەتەيىك، 22-24 -قازان كۇندەرى قازاندا بريكس-كە مۇشە ەلدەردىڭ سامميتى ءوتىپ جاتىر. ءىس-شاراعا ءبىرقاتار مەملەكەتتىڭ باسشىلارى كەلگەن. ولاردىڭ اراسىندا ءۇندىستان پرەمەر-ءمينيسترى نارەندرا مودي، وڭتۇستىك افريكا رەسپۋبليكاسىنىڭ پرەزيدەنتى ماتامەلا سيريل رامافوسا، ەفيوپيا پرەمەر- ءمينيسترى ابي احمەد، مىسىر پرەزيدەنتى ابدەل فاتتاح اس-سيسي، قىتاي ءتوراعاسى شي جينپيڭ، تۇركيا پرەزيدەنتى رەجەپ تايىپ ەردوعان بار.
23-قازاندا «قازان ەكسپو» الاڭىندا بريكس سامميتىنىڭ كەڭەيتىلگەن قۇرامداعى وتىرىسى، سامميتكە قاتىسۋشىلاردىڭ شاعىن قۇرامداعى كەزدەسۋى ءوتتى. كەزدەسۋدە رەسەي پرەزيدەنتى ۆلاديمير پۋتين بريكس-تىڭ سەرىكتەس ەلدەرىنىڭ ءتىزىمىن قۇرۋدى جانە ونى قورىتىندى دەكلاراتسياعا ەنگىزۋدى ۇسىندى. سونىمەن قاتار ول 30-دان استام مەملەكەتتىڭ بريكس قۇرامىنا كىرۋگە قىزىعۋشىلىق تانىتقانىن اتاپ ءوتتى.
ق ر پرەزيدەنتى قاسىم-جومارت توقايەۆ رەسەي فەدەراتسياسىنىڭ پرەزيدەنتى ۆلاديمير پۋتيننىڭ شاقىرۋىمەن بريكس- كە مۇشە مەملەكەتتەر باسشىلارىنىڭ XVI سامميتىنە قاتىسۋ ءۇشىن قازان قالاسىنا جۇمىس ساپارىمەن بارعان بولاتىن.
اۆتور
مارلان جيەمباي
