قازاقستان- قىتاي مۇناي قۇبىرىنىڭ وتكىزۋ مۇمكىندىگىن ۇلعايتۋ شارالارى قولعا الىندى
استانا. KAZINFORM - قازاقستان- قىتاي مۇناي قۇبىرىنىڭ وتكىزۋ مۇمكىندىگىن ۇلعايتۋ شارالارى قولعا الىندى. بۇل تۋرالى قىتاي حالىق رەسپۋبليكاسىنىڭ ءتوراعاسى شي جينپيڭمەن كەلىسسوزدەردەن كەيىنگى باسپا سوزگە ارنالعان مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.
«تاعى ءبىر ماسەلە، قولعا الىنعان اۋقىمدى ەنەرگەتيكالىق جوبالاردى ءتيىمدى جۇزەگە اسىرۋ قاجەت. قازىر قازاقستاندا مۇناي- حيميا زاۋىتتارى سالىنىپ جاتىر. شىمكەنتتەگى مۇناي وڭدەۋ زاۋىتىن جاڭعىرتۋ جۇمىستارى جۇرگىزىلۋدە. قازاقستان- قىتاي مۇناي قۇبىرىنىڭ وتكىزۋ مۇمكىندىگىن ۇلعايتۋ شارالارى قولعا الىندى. كوپ ۇزاماي بۇل جوبالار ەكونوميكامىزعا ۇلەس قوسا باستايدى. ساپار اياسىندا قازاق- قىتاي ىسكەرلىك كەڭەسىنىڭ وتىرىسى ءوتتى. وندا ءبىرقاتار ينۆەستيتسيالىق كەلىسىمگە قول قويدىق. وسى كوممەرتسيالىق كەلىسىمدەر ەكونوميكالىق بايلانىستى نىعايتۋعا جول اشادى. ءبىز كولىك- لوگيستيكا سالاسىنداعى ىقپالداستىقتى جانداندىرۋ قاجەتتىگىنە دە نازار اۋداردىق. اسىرەسە، شي جينپيڭ مىرزانىڭ استانادا جاريالاعان جاھاندىق «ءبىر بەلدەۋ، ءبىر جول» باستاماسى جانە ترانسكاسپي حالىقارالىق كولىك باعدارى اياسىنداعى ىنتىماقتاستىق ماسەلەلەرىن تالقىلادىق»، - دەدى مەملەكەت باسشىسى.
پرەزيدەنت بىلتىر تەمىر جول ارقىلى تاسىمالداناتىن جۇك كولەمى 22 پايىزعا ارتىپ، 28 ميلليون تونناعا جەتكەنىن ايتتى.
«بۇل - رەكوردتىق كورسەتكىش. ليانيۋنگان، «قورعاس - شىعىس قاقپاسى» جانە شيان قالاسىنداعى قۇرعاق پورتتاردا جۇزەگە اسىرىلعان بىرلەسكەن جوبالاردىڭ ناتيجەسىندە كولىك- لوگيستيكالىق الەۋەتىمىز ەداۋىر ارتتى. قازىرگى تاڭدا اياگوز- باقتى ءۇشىنشى ترانسشەكارالىق تەمىر جول قۇرىلىسى بەلسەندى ءجۇرىپ جاتىر. بۇگىن ءبىز تراسكاسپي حالىقارالىق كولىك باعدارى ارقىلى جۇك تاسىمالىن ىسكە قوسۋ ءىس-شاراسىنا بەينەبايلانىس رەجيىمىندە قاتىستىق. بۇل باعدار ەۋرازيا قۇرلىعىنداعى كولىك- لوگيستيكا قاتىناستارىن دامىتۋعا تىڭ سەرپىن بەرەدى»، - دەدى قاسىم-جومارت كەمەل ۇلى.
اۆتور
مارلان جيەمباي
