قازاقستان - قىتاي: كەدەن قىزمەتتەرىنىڭ باسشىلارى ۇزدىكسىز ساۋدا فورۋمىنا قاتىستى

Фото: Мемкірістер комитеті
Фото: из открытых источников

قازاقستان جانە قىتاي كەدەن قىزمەتتەرىنىڭ باسشىلارى ۇزدىكسىز ساۋدا فورۋمىندا باس قوستى، دەپ حابارلايدى Kazinform مەملەكەتتىك كىرىستەر كوميتەتىنە سىلتەمە جاساپ.

بەيجىڭ قالاسىندا وتكەن «ءبىر بەلدەۋ، ءبىر جول» باستاماسىنىڭ حالىقارالىق ىنتىماقتاستىق جونىندەگى Ⅲ فورۋمى اياسىندا قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتىنىڭ ءتوراعاسى جاندوس دۇيسەمبيەۆ ۇزدىكسىز ساۋدا جونىندەگى تاقىرىپتىق جيىنعا قاتىستى.

اتالمىش ءىس-شارانى ق ح ر كوممەرتسيا مينيسترلىگى، ق ح ر باس كەدەن باسقارماسى، ق ح ر مەملەكەتتىك سالىق اكىمشىلىگى جانە قىتاي ەكسيمبانكى بىرلەسە ۇيىمداستىردى.

ۇزدىكسىز ساۋدا فورۋمىنا قاتىسۋشىلار وتىرىس بارىسىندا جاھاندىق ونەركاسىپتىك تىزبەكتەر مەن جەتكىزۋ تىزبەكتەرىنىڭ تۇراقتىلىعىن قولداۋ، ەلەكتروندىق كوممەرتسيا مەن «جاسىل» ساۋدانى ىلگەرىلەتۋ، كەدەندىك، سالىقتىق جانە قارجىلىق ىنتىماقتاستىقتى نىعايتۋ ماسەلەلەرىن تالقىلادى.

ساپار اياسىندا جاندوس دۇيسەمبيەۆ ق ح ر مەملەكەتتىك سالىق اكىمشىلىگىنىڭ كوميسسارى ۆان جيۋنمەن كەزدەسۋ وتكىزدى. وندا تاراپتار ەكىجاقتى ىنتىماقتاستىقتى، سونداي-اق «ءبىر بەلدەۋ، ءبىر جول» باستاماسى شەڭبەرىندەگى ارىپتەستىكتى نىعايتۋعا ۋاعدالاستى.

ق ر ق م م ك ك ءتوراعاسى «ورتالىق ازيا-قىتاي» باستاماسىنىڭ كەدەن قىزمەتتەرى باسشىلارىنىڭ وتىرىسىنا قاتىستى.

كەزدەسۋدە كەدەندىك ىنتىماقتاستىقتىڭ وزەكتى ماسەلەلەرى تالقىلاندى. اتاپ ايتقاندا، تاراپتار: «ءبىرىڭعاي تەرەزە» جوباسى شەڭبەرىندە ىنتىماقتاستىق تۋرالى كەلىسىم جاساسۋ، شەكارا ماڭىنداعى وتكىزۋ پۋنكتتەرىن باسقارۋ سالاسىنداعى ىنتىماقتاستىق، ينترۋزيۆتى ەمەس جەتە تەكسەرۋ جانە زياتكەرلىك كارتوگرافيالىق جەتە تەكسەرۋ، كەدەندىك تاۋەكەلدەردى باسقارۋ، قۇقىق قورعاۋ سالاسىنداعى ىنتىماقتاستىق تەتىكتەرىن جەتىلدىرۋ سالاسىندا تاجىريبە الماسۋ بويىنشا جۇمىس توپتارىن قۇرۋ تۋرالى ۋاعدالاستى.

سونىمەن قاتار ورتالىق ازيا ەلدەرى قىتاي تاراپىنىڭ ساۋدانى جەڭىلدەتۋ جانە تاۋارلاردى جەتكىزۋدىڭ حالىقارالىق تىزبەگىنىڭ قاۋىپسىزدىگىن ارتتىرۋ جونىندەگى شارالاردى جەتىلدىرۋگە باعىتتالعان، تاۋارلار تۋرالى الدىن الا اقپارات الماسۋ سالاسىنداعى ىنتىماقتاستىق تۋرالى كەلىسىم جاساسۋ مۇمكىندىگىن قاراۋدى ۇسىندى.

كەلىسسوزدەر قورىتىندىسى بويىنشا تاراپتار ماسەلەنى بىرلەسىپ شەشۋگە جانە ءار تاراپتىڭ زاڭناماسىن ەسكەرە وتىرىپ، كەلىسىمنىڭ جوباسىن ازىرلەيتىن بولدى.

«ورتالىق ازيا - قىتاي» كەزدەسۋ الاڭىندا جاندوس دۇيسەمبيەۆ ق ح ر باس كەدەن باسقارماسىنىڭ ءمينيسترى يۋي جيانحۋامەن اڭگىمەلەسىپ، قازاقستان-قىتاي مەملەكەتتىك شەكاراسىندا وتكىزۋ مۇمكىندىگىن ۇلعايتۋ ماسەلەسىن تالقىلادى جانە جاقىن ارادا تۋىندايتىن پروبلەمالىق ماسەلەلەردى جەدەل شەشۋ بويىنشا جۇمىس تەتىگىن قۇرۋ تۋرالى كەلىستى.

سوڭعى جاڭالىقتار