قازاقستان- قىتاي شەكاراسىنداعى «قورعاس» ىنتىماقتاستىق ورتالىعىنا بيىل 2 ميلليوننان استام ادام كەلگەن
استانا. قازاقپارات - 2024 -جىل قىتايدا قازاقستان تۋريزمى جىلى بولىپ جاريالانعاندىقتان قازاقستان- قىتاي شەكاراسىندا ورنالاسقان «قورعاس» ىنتىماقتاستىق ورتالىعىنا تۋريستەر كوپتەپ كەلە باستادى.
قىتايلىق «ChinaNews» حابارلاعانداي، وسى جىلدىڭ قاڭتار- مامىر ايلارى ارالىعىندا ىنتىماقتاستىق ورتالىعىنا كەلۋشىلەر سانى 2 ميلليوننان اسىپ، وتكەن جىلدىڭ سايكەس كەزەڭىمەن سالىستىرعاندا 148 پايىزعا ارتقان.
«قورعاس» ىنتىماقتاستىق ورتالىعىنا كىرىپ- شىعاتىن ەكى ەلدىڭ تۋريستەرى نەگىزىنەن ترانسشەكارالىق تۋريزم مەن شوپپينگپەن اينالىسادى.
قىتاي-قازاقستان قورعاس حالىقارالىق شەكارالىق ىنتىماقتاستىق ورتالىعىنىڭ جالپى اۋدانى 5,6 شارشى شاقىرىم جانە قىتايدان، ورتالىق ازيادان جانە ەۋروپا ەلدەرىنەن 10000 عا جۋىق تاۋار ءتۇرىن بىرىكتىرەتىن 200 دەن استام باجسىز كومپانيا مەن 1000 نان استام ساۋداگەردى بىرىكتىرەدى.
ىنتىماقتاستىق ورتالىعى اياسىندا ەكى ەلدىڭ ازاماتتارى مەن ءۇشىنشى ەلدىڭ ازاماتتارىنا ۆيزا قاجەت ەمەس، پاسپورت بولسا جەتكىلىكتى. تۋريستەر وسى اۋماقتا ساۋدا-ساتتىق جاساپ، تاۋار ساتىپ الادى، ءار ادام كۇنىنە 490000 تەڭگە شاماسىندا （8 مىڭ يۋان）باجسىز تاۋار تاسىمالداي الادى.
اۆتور
مۇقتار مۇرات
