قازاقستان قىرعىزستانداعى سەلدەن زارداپ شەككەندەرگە گۋمانيتارلىق كومەك جەتكىزدى
وش. قازاقپارات - «Biz Birgemiz Qazaqstan» قازاقستاندىق قوعامدىق قورى سەلدەن زارداپ شەككەن قىرعىزستاندىقتارعا قولداۋ كورسەتۋ ءۇشىن 40 توننا گۋمانيتارلىق كومەك جونەلتتى.
بۇل تۋرالى Kazinform اگەنتتىگىنىڭ ءتىلشىسى حابارلايدى.
قىرعىزستان رەسپۋبليكاسى توتەنشە جاعدايلار مينيسترلىگىنىڭ مالىمەتىنشە، 19-شىلدە كۇنى تاڭەرتەڭ جۇك كولىكتەرى قازاق-قىرعىز شەكاراسىنان ءوتىپ، وش وبلىسىنا بەت الادى. گۋمانيتارلىق كومەك قۇرامىندا ازىق-تۇلىك ونىمدەرى - ۇن، قانت جانە باسقا دا ونىمدەر، ەڭ قاجەتتى تاۋارلار، سونداي-اق گيگيەنالىق زاتتار بار.
ەستەرىڭىزگە سالا كەتەيىك، 14-شىلدەدە وش قالاسى مەن وش وبلىسىندا جويقىن سەل بولىپ، سالدارىنان 5 ادام قازا تاپتى. مادى، داتكا جانە باش- بۋلاك ەلدى مەكەندەرىندە 642 تۇرعىن ءۇي، ءتورت مەكتەپ، بالاباقشا، ەكى اۋرۋحانا، مۇراجاي جانە مەديتسينالىق پۋنكت سۋ استىندا قالدى. وشتا 146 تۇرعىن ءۇي مەن بالاباقشا زارداپ شەكتى.
