قازاقستان قۇراماسىن XXXIII جازعى وليمپياداعا شىعارىپ سالۋ ءراسىمى ءوتتى
الماتى. KAZINFORM - الماتىدا قازاقستان قۇراماسىن فرانتسيا استاناسى پاريج قالاسىندا وتەتىن جازعى وليمپياداعا شىعارىپ سالۋ ءراسىمى بولدى.
قازاقستاندىق سپورتشىلاردى فرانسيا استاناسى پاريج قالاسىندا وتەتىن جازعى وليمپياداعا شىعارىپ سالۋعا ق ر تۋريزم جانە سپورت ءمينيسترى ەرمەك مارجىقپايەۆ، وليمپيادا چەمپيوندارى ەرماحان ىبرايىموۆ، يسلام بايرامۋكوۆ، ولگا شيشيگينا، دميتري بالاندين جانە ب ا ق وكىلدەرى كەلدى.
ق ر تۋريزم جانە سپورت ءمينيسترى ەرمەك مارجىقپايەۆ سپورتشىلار جانە جاتتىقتىرۋشىلار قۇرامىنا الداعى جارىستارعا ساتتىلىك تىلەدى.
مينيستر بۇل وقيعانىڭ ەلىمىز ءۇشىن ەرەكشە ماڭىزعا يە ەكەنىن اتاپ ءوتتى.
«سىزدەردىڭ الدىڭىزدا ەلىمىزدى پاريج وليمپياداسىندا تانىستىرۋ، ەل نامىسىن ابىرويمەن قورعاۋ سياقتى ماڭىزدى ءارى وتە جاۋاپتى مىندەت تۇر. سىزدەردىڭ چەمپيوندىق مىنەزىڭىز، تاباندىلىعىڭىز، جەڭىسكە دەگەن ەرىك-جىگەرىڭىز، وسى كۇنگە دەيىن جيعان تاجىريبەلەرىڭىز، جاتتىقتىرۋشىلاردىڭ، دارىگەرلەردىڭ، ماسساج جاساۋشىلاردىڭ قاجىرلى ەڭبەگىنىڭ ارقاسىندا ۇلكەن ناتيجەگە جەتەتىنىمىزگە سەنىمدىمىن. تاۋەلسىزدىك جىلدارىندا قازاقستان جازعى جانە قىسقى وليمپيا ويىندارىنىڭ 79 جۇلدەگەرىن، ونىڭ ىشىندە 15 وليمپيادا چەمپيونىن تاربيەلەپ شىعاردى. وليمپياداداعى جەتىستىكتەر - بۇكىل ەلدىڭ الەمدەگى يميدجى، مەملەكەتتىڭ ءال-اۋقاتىنىڭ كورسەتكىشى، ەڭ باستىسى، بۇل - سىزدەردىڭ كوپجىلدىق جانە قاجىرلى ەڭبەكتەرىڭىزدىڭ ناتيجەسى»، - دەدى ەرمەك مارجىقپايەۆ.
ەركىن كۇرەستەن ەڭبەك سىڭىرگەن سپورت شەبەرى جانە سيدنەي وليمپياداسىنىڭ كۇمىس جۇلدەگەرى يسلام بايرامۋكوۆ، قازاقستاندىق سپورتشىلارعا سەنىم مول ەكەنىن جەتكىزدى.
وليمپيادا ويىندارىندا جەڭىسكە جەتۋ - كەز كەلگەن سپورتشىنىڭ ارمانى. سپورت زالىنا كەلگەن كۇنىنەن باستاپ، الدىنا وسىنداي ماقسات قويادى. بىزدە قازىر ەركىن كۇرەستەن ءتورت جولداما بار.
قازاقستان كومانداسىنىڭ مۇشەسى مەيرامبەك قارتباي جاقىندا الدى. جىگىتتەردىڭ جەڭىس تۇعىرىنان كورىنۋگە مۇمكىندىكتەرى بار.
فرانتسيا استاناسىندا قازاقستان قۇراماسى ساپىنان 80 سپورتشى سپورتتىڭ 25 تۇرىنەن باق سىناپ، 81 مەدال جيىنتىعىنا تالاسادى.
ايتا كەتۋ كەرەك، قازاقستان تاۋەلسىزدىك جىلدارىنان بەرى وسىمەن سەگىزىنشى مارتە جازعى وليمپياداعا قاتىسپاق.
قازاقستان قۇراماسىنىڭ سپورتشىلارى بيىل العاش رەت وليمپيادا باعدارلاماسىنا ەنگەن برەيكينگ جانە بادمينتون سياقتى سپورت تۇرلەرىنەن ونەر كورسەتەدى. برەيكينگتەن ەل نامىسىن ءامىر زاكيروۆ قورعاسا، بادمينتون سايىسىندا دميتري پانارين باق سىنايدى.
وليمپيا ويىندارىنىڭ اشىلۋ سالتاناتى 26-شىلدەدە پاريجدەگى سەنا وزەنىندە وتەدى. جارىسقا 205 ەلدەن 10 مىڭنان استام سپورتشى قاتىسادى. ولار 32 سپورت تۇرىنەن 329 مەدال جيىنتىعىن ساراپقا سالادى.
ناقتىراق ايتساق، بوكس، دزيۋدو، سپورتتتىق گيمناستيكا، جەڭىل اتلەتيكا، بايداركا مەن كانوەدە ەسۋ، وقپەن اتۋ، سەمسەرلەسۋ، گرەك-ريم كۇرەسى، ەركىن كۇرەس، ساداق اتۋ، ستەندتىك اتۋ، تەننيس، ۆەلوشوسسە، ءجۇزۋ، زاماناۋي بەسسايىس، تاەكۆوندو، ۆەلوترەك، باتۋت گيمناستيكاسى، بادمينتون، اكادەميالىق ەسۋ، كوركەم گيمناستيكا، ترياتلون، ۇستەل تەننيسى، قۇزعا شىعۋ جانە برەيكينگتەن وليمپيادا ويىندارىندا سىنعا تۇسەدى.
وسىعان دەيىن الماتىداعى وليمپياداعا دايىندىق ورتالىعىندا سپورتشىلاردىڭ قالاي جاتتىعىپ جاتقانى تۋرالى جازعان ەدىك.
ەستەرىڭىزگە سالا كەتەيىك، ەلىمىزدە العاش رەت وليمپيادا ويىندارىن بەس بىردەي تەلەارنا تىكەلەي ەفيردە كورسەتەتىن بولادى.
وليمپيادا ويىندارىنان 21 قازاقستاندىق جۋرناليست تىكەلەي حابار تاراتادى.
اۆتور
الما مۇقانوۆا
