قازاقستان قۇراماسى ازيا پارا ويىندارىن 41 مەدالمەن اياقتادى

حاڭچجوۋداعى IV ازيا پارا ويىندارىندا قازاقستاندىق سپورتشىلار جارىستى 11-ورىنمەن اياقتادى. بۇل تۋرالى Sports.kz پورتالى حابارلايدى.

ەلىمىزدىڭ اتىنان سوڭعى بولىپ جارىس جولىنا 107 كەلىدەن جوعارى سالماق دارەجەسىندە پاۋەرليفتەر عاني يسەنتەميروۆ شىقتى. ول جارىس قورىتىندىسى بويىنشا التى سپورتشىنىڭ اراسىنان التىنشى ورىندى يەلەندى.

بۇل دودادا قازاقستاندىق پاراسپورتشىلار بارلىعى 41 مەدال جەڭىپ الدى: 8 التىن، 12 كۇمىس جانە 21 قولا. ەل نامىسىن 14 سپورت تۇرىنەن 131 سپورتشى قورعادى. وسىلايشا قازاقستان قۇراماسى جالپىكوماندالىق ەسەپتە 11-ورىنعا تۇراقتادى.

مەدالدىق ەسەپتە جارىس قوجايىنى قىتاي قۇراماسى جەڭىمپاز اتاندى. ولاردىڭ قورجىنىندا - 521 مەدال (214 التىن، 167 كۇمىس جانە 140 قولا). ودان كەيىن 131 مەدالمەن (44-46-41) يران قۇرماسى ەكىنشى ورىنعا جايعاستى. ال جاپوندىقتار 150 مەدالمەن (42-49-59) ۇزدىك ۇشتىكتەن كورىندى.