قازاقستان ۇن نارىعىندا ۇتىلىپ جاتىر

استانا. قازاقپارات - وتاندىق اۋىلشارۋاشىلىعىندا جالپى ءونىم كولەمى شامامەن 8 پروتسەنتكە ازايدى. ال وسىمدىك شارۋاشىلىعىنداعى بۇل كورسەتكىش 15 پروتسەنتكە دەيىن تۇسكەن.

بۇل تۋرالى سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ وتىرىسىندا دەپۋتات ءالي بەكتايەۆ ايتتى. جيىنعا قاتىسۋشىلار وتاندىق تاۋار وندىرۋشىلەردى قولداۋ جانە باسەكەگە قابىلەتتىلىكتى ارتتىرۋ ساياساتى ءالسىز ەكەنىن جاسىرمادى. ماسەلەن، ۇن ەكسپورتى اقساپ تۇر. وسىدان 10 جىل بۇرىن كورشى ەلدەر تاراپىنان قازاقستان ونىمىنە دەگەن سۇرانىس جوعارى بولاتىن. مىسالى، «وزبەكستانعا جىلىنا 1 ميلليون 200 مىڭ تونناداي ۇن جىبەرەتىنبىز. قازىرگى ەكسپورت كولەمى 4 ەسە ازايدى»، - دەيدى كاسىپكەرلەر. سەناتور ءالي بەكتايەۆ قازاقستان نارىعى اياسىنىڭ تارىلىپ جاتقانىن بىلايشا ءتۇسىندىردى.

ءالي بەكتايەۆ، ق ر پارلامەنتى سەناتىنىڭ دەپۋتاتى:

- مەن ءوزىم وڭتۇستىكتىڭ ازاماتىمىن. شىمكەنتتە ءبىر 20-30 ديىرمەن ىستەپ تۇراتىن. ونىڭ بارلىعى قازىر تۇر. ادامدار جۇمىسسىز قالدى. ال كورشى وزبەكستاندا ءبىر ەمەس، بىرنەشە ديىرمەن اشىلىپ جاتىر. ولار بىزدەن استىق الادى. ءبىراق ۇندى وتكىزبەيدى. باج سالىعى بار. استىق باج سالىعىنسىز ءوتىپ جاتىر. سول جەردەن ولار وڭدەپ، ۇندى تاجىكستان مەن اۋعانستانعا ساتىپ جاتىر. نامىسقا تيە مە؟ تيەدى.

دەسەك تە بىلتىر ەكسپورتتالعان اۋىلشارۋاشىلىعى ونىمدەرىنىڭ قۇنى 5 ميلليارد ا ق ش دوللارىنان اسقان. ال اگروونەركاسىپ كەشەنىندەگى ءونىم ەكسپورتىنىڭ جالپى كولەمدە وڭدەلگەن ۇلەسى شامامەن 43 پروتسەنتكە جەتتى. بيىل بۇل كورسەتكىشتى 45 پروتسەنتكە جەتكىزۋ كوزدەلىپ وتىر. وسىلايشا، پرەزيدەنتتىڭ 70 پروتسەنتكە جەتكىزۋ تۋرالى تاپسىرماسىنىڭ ورىندالۋىن كەزەڭ-كەزەڭىمەن قامتاماسىز ەتەمىز، دەيدى اۋىل شارۋاشىلىعى مينيسترلىگىنىڭ وكىلدەرى.

www.24.kz