قازاقستان نەگە افريكاشىل بولىپ كەتتى – س ءى م جاۋابى
استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ الەۋمەتتىك جەلىدەگى «قازاقستان نەگە تىم افريكاشىل بولىپ كەتتى؟» دەگەن سىنعا جاۋاپ بەردى.
- ءبىزدىڭ افريكا قۇرلىعى ەلدەرىمەن ىنتىماقتاستىعىمىز ايتارلىقتاي بەلسەندى دامىپ كەلە جاتقانىن وزدەرىڭىز كورىپ وتىرسىزدار. قوعامدا وسى بايلانىستار تۋرالى سۇراقتار تۋىنداپ وتىر. سوندىقتان قازاقستاننىڭ سىرتقى ساياساتىنىڭ وسى باعىتتا اتقارىپ جاتقان جۇمىستارى تۋرالى قىسقاشا تۇسىنىك بەرگىم كەلەدى، - دەپ باستادى س ءى م رەسمي وكىلى.
ايتۋىنشا، افريكا ەلدەرىمەن ІТ جانە ەلەكتروندىق ۇكىمەت سالاسىنداعى ءوزارا ءىس-قيمىل اسا جەمىستى بولىپ وتىر.
- مەملەكەتتىك قىزمەتتەردىڭ سيفرلانۋى، Smart-شەشىمدەر جانە ينفراقۇرىلىمدى دامىتۋ باعىتىندا تاجىريبە الماسىپ جاتىرمىز. ءبىزدىڭ جوبالار كوپتەگەن افريكالىق ەلدەر ءۇشىن پراكتيكالىق مانگە يە. رەسمي ساپارلار ءجيى ءوزارا بايلانىستاردىڭ قوزعاۋشى كۇشى بولادى. مۇنداي قارىم-قاتىناستاردىڭ جاندانۋى ديپلوماتيالىق وكىلدىكتەرىمىزدىڭ كەڭەيۋىمەن بايلانىستى. 2012 جىلى افريكا قۇرلىعىندا تەك مىسىردا عانا ەلشىلىگىمىز بولدى. قازىر ولاردىڭ سانى 6 عا جەتتى - مىسىر، وڭتۇستىك افريكا رەسپۋبليكاسى، ەفيوپيا، ماروككو، الجير جانە كەنيادا ەلشىلىكتەرىمىز بار، - دەدى ول.
ايبەك سمادياروۆ ديپلوماتيالىق ميسسيالاردى اشۋ ناقتى ەكونوميكالىق ناتيجەلەر بەرگەنىن ايتادى.
- ەگەر 2012 -جىلى قازاقستاننىڭ افريكا ەلدەرىمەن تاۋار اينالىمى شاشامەن 100 ميلليون دوللار بولسا، 2022 -جىلى ول العاشقى رەت 1 ميلليارد دوللاردان استى. بۇل - قازاق- افريكالىق ساۋدا تاريحىنداعى رەكورد. سونىمەن قاتار ديپلوماتيالىق ميسسيالارى جوق ەلدەردە قۇرمەتتى كونسۋلدار ينستيتۋتىن بەلسەندى تۇردە دامىتىپ كەلەمىز. بۇگىن قازاقستان افريكاعا كۇكىرت، مۇناي كوكسىن مەتالل ونىمدەرىن، اۋىل شارۋاشىلىعى ونىمدەرى مەن مينەرالدى تىڭايتقىشتاردى ەكسپورتتايدى. مىسالى، بيىل مامىردىڭ باسىندا 15 جىلدان كەيىن العاشقى رەت قازاق ءداندى داقىلدارىنىڭ پارتياسى ماروككوعا جىبەرىلدى. بۇل ەكسپورت باعىتىندا ءارتاراپتاندىرۋدا ماڭىزدى قادام بولدى. سونىمەن قاتار ءداندى داقىلداردى مىسىر، نيگەريا، كوت- ديۆۋار، سەنەگال جانە باسقا دا قۇرلىق ەلدەرىنە جەتكىزۋ ماسەلەلەرى قاراستىرىلىپ وتىر.
افريكادان قازاقستانعا جەمىستەر، كوفە، كاكاو بۇرشاقتارى، شاي، فارماتسيەۆتيكالىق ونىمدەر، تەكستيل، كوسمەتيكا جانە ەلەكتر تەحنيكاسى تاسىمالدانادى، - دەدى س ءى م رەسمي وكىلى.
قازاقستان افريكا ەلدەرىمەن بايلانىستى كۇشەيتۋگە باسا ءمان بەرەتىنىن جازعان بولاتىنبىز.
اۆتور
ەسىمجان ناقتىباي
