قازاقستان مونتەرلەرى العاش رەت حالىقتى توقتان اجىراتپاي كەرنەۋلى جۇمىس جۇرگىزدى
پاۆلودار. KAZINFORM - پاۆلودار ەلەكترجەلىستىك تاراتۋ كومپانياسىنىڭ ەلەكتر مونتەرلەر بريگاداسى قازاقستاندا العاش رەت ەلەكتر جەلىسىندە جۇمىستاردى كەرنەۋدى اجىراتپاي جۇرگىزدى.
جاڭا جوعارى تەحنولوگيالىق ءادىس تۇتىنۋشىلاردى ەلەكترمەن ۇزدىكسىز جابدىقتاي وتىرىپ، قاجەتتى جۇمىستاردى جۇرگىزۋ مۇمكىندىگىن بەرەدى.
پاۆلودار وبلىسى ميچۋرينو اۋىلىندا 0,4 كيلوۆولت ەلەكتر جەلىسى تىرەكتەرىندەگى وقشاۋلاعىشتاردى اۋىستىرۋ جۇمىستارى جۇرگىزىلدى.
بۇرىن مۇنداي كولەمدى جۇمىستار ءۇشىن ەلەكتر ەنەرگياسىن كەم دەگەندە 4 ساعاتقا اجىراتۋ قاجەت بولار ەدى.
قولدانىستاعى جابدىقتا جۇمىس ىستەۋدىڭ زاماناۋي ءادىسىن ەنگىزۋ ءۇشىن پاۆلودار ەلەكترجەلىستىك تاراتۋ كومپانياسىنىڭ قىزمەتكەرلەرى قازان قالاسىندا وقىتۋدان ءوتتى.
پاۆلودار ەنەرگەتيكتەرى ەمتيحان تاپسىرىپ، تاتارستان ەنەرگەتيكتەرىمەن بىرگە تاعىلىمدامادان ءوتتى، كەرنەۋدى اجىراتپاي 1000 ۆولتكە دەيىنگى ەلەكتر جەلىلەرىندەگى جۇمىسقا رۇقساتناما سەرتيفيكات الدى.
بۇگىنگى تاڭدا كومپانيادا 0,4 كيلوۆولت كەرنەۋلى جۇمىس تەحنولوگياسىن مەڭگەرگەن ەلەكتر مونتەرلەردىڭ دايىندالعان ەكى بريگاداسى بار.
ەنەرگەتيكتەر ەلەكتر بەرۋ جەلىلەرىندەگى كەرنەۋلى جۇمىستاردى ورىنداۋدى 10 كيلوۆولتقا دەيىن كەڭەيتۋدى جوسپارلاپ وتىر، بۇل كەرنەۋى اجىراتىلاتىن تۇتىنۋشىلار سانىن ەداۋىر قىسقارتادى.
«10 كيلوۆولتكە دەيىنگى اۋە جەلىلەرىندەگى جۇمىستار ءۇشىن پەرسونالدى وقىتۋ جوسپارلارى بەكىتىلىپ قويدى. بۇل ەلەكتر جەلىلەرىن پايدالانۋداعى ماڭىزدى كەزەڭ، سەبەبى مۇنداي جۇمىستاردىڭ قاۋىپسىزدىگى مەن تيىمدىلىگى جۇمىسشى بريگادالاردىڭ بىلىكتىلىگىنە تىكەلەي بايلانىستى. 10 كيلوۆولتكە دەيىنگى كەرنەۋلى جۇمىستاردى ورىنداۋ ءۇشىن قاجەتتى مامانداندىرىلعان جابدىقتى ساتىپ الۋ ىسكە اسىرىلۋدا، بۇل - وقشاۋلاعىش بۋىنى بار اۆتوگيدروكوتەرگىش جانە ارنايى قۇرالدار. قازىرگى ۋاقىتتا ەلىمىزدەن تىس جەرلەرگە شىقپاي-اق پەرسونالدى وقىتۋ جانە جاتتىقتىرۋ ءۇشىن وقۋ-جاتتىعۋ ورتالىعىنىڭ قۇرىلىسى جوباسى ازىرلەنۋدە، بۇل مامانداردى دايارلاۋ ساپاسىن ارتتىرىپ، كادرلاردى دايارلاۋعا جۇمسالاتىن ۋاقىت پەن قارجىلىق شىعىنداردى قىسقارتۋعا مۇمكىندىك بەرەدى. جابدىقتار مەن قىزمەتكەرلەرگە سالىنعان ينۆەستيتسيا - كەرنەۋلى جۇمىس تەحنولوگياسىن ءساتتى ەنگىزۋدىڭ قاجەتتى شارتى»، - دەيدى «پاۆلودار ە ت ك» ا ق باس ديرەكتورى الەكساندر گلوتوۆ.
ماماندار جۇمىستىڭ بۇل ءتۇرى - جوسپارلى جوندەۋ جۇمىستارىن جۇرگىزۋدىڭ كەزەكتى ءتاسىلى عانا ەمەس، قازاقستان ەنەرگەتيكاسى دامۋىنىڭ جاڭا كەزەڭى ەكەنىن اتاپ ءوتتى.
كەرنەۋلى جۇمىستاردى جۇرگىزۋ تەحنولوگيالارى ۇنەمى جەتىلدىرىلۋدە، بۇل تەحنولوگيالاردى قولدانۋ پاۆلودار ەنەرگەتيكتەرىنە قىتاي، رەسەي، جاپونيا، كانادا جانە باسقا ەلدەردىڭ ەنەرگەتيكتەرىمەن قاتار تۇرۋ مۇمكىندىگىن بەردى.
