قازاقستان مەن يتاليا اراسىندا 180 ميلليون ەۋروعا مەموراندۋمدار بەكىتىلدى
استانا. KAZINFORM - ەلوردادا وتكەن «يتاليا - قازاقستان» ىسكەرلىك فورۋمىندا ەكى ەلدىڭ ۇيىمدارى جالپى سوماسى 180 ميلليون ەۋرو بولاتىن 10 مەموراندۋمعا قول قويدى.
جوبالار ماشينا جاساۋ، مۇناي حيمياسى، اۋىل شارۋاشىلىعىن قايتا وڭدەۋ، مەتاللۋرگيا، لوگيستيكالىق پروتسەستەردى تسيفرلاندىرۋ ءتارىزدى ستراتەگيالىق سالالاردى قامتيدى. سونداي-اق قازاقستان اۋماعىندا بىرلەسكەن وندىرىستەر قۇرۋ ارقىلى ەۋروپا، ورتالىق ازيا جانە قىتاي نارىعىنا شىعۋ كوزدەلگەن. كەزدەسۋگە «سامۇرىق- قازىنا» ، «قازمۇنايگاز»، Eni ،Maire Tecnimont ،AnsaldoEnergia سەكىلدى ءىرى ۇيىمداردىڭ وكىلدەرى قاتىسىپ جاتىر.
ساۋدا جانە ينتەگراتسيا ءمينيسترى ارمان شاققالييەۆ فورۋم قازاقستان مەن يتاليا اراسىنداعى ەكونوميكالىق قاتىناستاردىڭ جاڭا كەزەڭىنىڭ باستالۋىن بىلدىرەتىنىن اتاپ ءوتتى.
- بۇگىنگى فورۋم ساۋدا-ەكونوميكالىق ارىپتەستىكتى نىعايتۋدىڭ نەگىزگى الاڭىنا جانە جاھاندىق وزگەرىستەر جاعدايىنداعى ستراتەگيالىق ديالوگقا ۇمتىلۋ سيمۆولىنا اينالدى. قازاقستان يتاليا رەسپۋبليكاسىمەن جان-جاقتى، پراگماتيكالىق جانە ۇزاق مەرزىمدى ىنتىماقتاستىقتى دامىتۋعا ەرەكشە ءمان بەرەدى. ءبىز تەك ساۋدانى كەڭەيتىپ قانا قويماي، جاھاندىق لوگيستيكا قايتا قۇرىلىپ، پروتەكتسيونيزم مەن الەمدىك ەكونوميكانىڭ سيفرلانۋى كۇشەيىپ جاتقان كەزدە حالىقارالىق جەتكىزۋ تىزبەكتەرىنىڭ تۇراقتىلىعىن قامتاماسىز ەتۋگە قابىلەتتى يننوۆاتسيالىق ەكوجۇيە قالىپتاستىرىپ جاتىرمىز، - دەدى مينيستر فورۋمنىڭ پانەلدى سەسسياسىندا.
فورۋمدى ساۋدا جانە ينتەگراتسيا مينيسترلىگى، قازاقستان-يتاليا ساۋدا قاۋىمداستىعى (ACIK) جانە ەكى ەل ەلشىلىكتەرى Astana International Forum اياسىندا بىرلەسىپ ۇيىمداستىرعان. بۇل كەزدەسۋ ەكىجاقتى ىنتىماقتاستىقتىڭ پەرسپەكتيۆالارىن تالقىلاۋ، ىسكەرلىك بايلانىستاردى نىعايتۋ جانە قوسىلعان قۇن تىزبەگى بويىنشا - لوگيستيكا مەن ونەركاسىپتىك كووپەراتسيادان باستاپ جوعارى تەحنولوگيالار مەن «جاسىل» ەنەرگەتيكاعا دەيىن بىرلەسكەن جوبالاردى ىسكە قوسۋ الاڭىنا اينالدى.
بۇعان دەيىن پرەمەر-مينيستر ولجاس بەكتەنوۆ قازاقستان مەن يتاليا اراسىنداعى ەكىجاقتى تاۋار اينالىمى 20 ميلليارد دوللارعا جۋىقتاعانىن ايتقان ەدى.
