قازاقستان مەن وزبەكستان پرەزيدەنتتەرى «مەدەۋ» سپورت كەشەنىنە باردى
الماتى. KAZINFORM - قاسىم-جومارت توقايەۆ پەن شاۆكات ميرزيەيەۆ «مەدەۋ» مۇز ايدىنىن ارالاپ كورىپ، تاۋ شاتقالىندا ورنالاسقان بىرەگەي نىساننىڭ تاريحىنان سىر شەرتەتىن فوتوكورمەمەن تانىستى. بۇل تۋرالى اقوردا ءمالىم ەتتى.
قاسىم-جومارت توقايەۆ پەن شاۆكات ميرزيەيەۆ «مەدەۋ» مۇز ايدىنىن ارالاپ كورىپ، تاۋ شاتقالىندا ورنالاسقان بىرەگەي نىساننىڭ تاريحىنان سىر شەرتەتىن فوتوكورمەمەن تانىستى.
- مۇز ايدىنىنىڭ الەمدىك سپورت تاريحىنداعى ورنى ەرەكشە. پرەزيدەنتتەرگە 1972-1991 -جىلدارى مۇندا ايەلدەر مەن ەرلەر اراسىندا وتكەن جارىستاردا بارلىق قاشىقتىق بويىنشا 247 رەت رەكورد ورناتىلعانى جونىندە ايتىلدى. «مەدەۋ» ءالى كۇنگە قازاقستاننىڭ ەڭ تانىمال تۋريستىك نىساندارىنىڭ ساناتىنا كىرەدى، - دەلىنگەن حابارلامادا.
2024-2025 -جىلعى ماۋسىمدا مۇز ايدىنىنا 460 مىڭ ادام كەلگەن. مەملەكەتتەر باسشىلارىنا «مەدەۋدى» ورنىقتى تۋريزم مودەلى بار الەمدىك دەڭگەيدەگى ورتالىققا اينالدىرۋدى كوزدەيتىن جاڭا دامۋ جوباسى تانىستىرىلدى. قاسىم- جومارت توقايەۆ پەن شاۆكات ميرزيەيەۆ الماتىلىق سپورتشى ەۆگەني كوشكينمەن اڭگىمەلەستى.
ول بيىل الەم كۋبوگىنىڭ سوڭعى ەكى كەزەڭىندە جەڭىمپاز اتانىپ، الەم چەمپيوناتى مەن ازيا ويىندارىندا جۇلدەلى ورىننان كورىنگەن بولاتىن. جۋىردا وتكەن قازاقستان سپارتاكياداسىندا سپورتشى ايقىن جەڭىسكە جەتىپ، 100 مەتر قاشىقتىقتا بەيرەسمي الەم رەكوردىن جاڭارتتى (9,31 سەكۋند). بۇدان كەيىن مەملەكەتتەر باسشىلارى مانەرلەپ سىرعاناۋ شەبەرلەرىنىڭ ونەرىن تاماشالادى.
بۇعان دەيىن حابارلانعانداي، وزبەكستان پرەزيدەنتى شاۆكات ميرزيەيەۆ قازاقستانعا جۇمىس ساپارىمەن كەلدى.
