قازاقستان مەن وزبەكستان جۇك تاسىمالى ماسەلەسىن شەشۋمەن اينالىساتىن جەدەل شتاب قۇرماق
تاشكەنت. KAZINFORM - قازاقستان مەن وزبەكستان كولىك مينيسترلىكتەرىنىڭ وكىلدەرى جانە ەكى ەلدىڭ كەدەن ورگاندارى ماماندارىنىڭ قاتىسۋىمەن ونلاين فورماتتا كەزدەسۋ ءوتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
«كەزدەسۋ بارىسىندا ەكى ەل اراسىنداعى تاۋار تاسىمالى كەزىندە تۋىندايتىن ماسەلەلەر تالقىلاندى. تيىسىنشە، تاراپتار جۇك تاسىمالىن ارتتىرۋعا قولبايلاۋ بولىپ وتىرعان ماسەلەلەردى تەز ارادا شەشۋمەن اينالىساتىن جەدەل شتاب قۇرۋعا ۋاعدالاستى. ونىڭ قۇرامىنا جاۋاپتى ۆەدومستۆولاردىڭ وكىلدەرى ەنەدى»، - دەپ ءمالىم ەتتى وزبەكستان كولىك مينيسترلىگىنىڭ باسپا ءسوز قىزمەتىنەن.
ەسكە سالايىق، تاياۋدا قازاق-وزبەك شەكاراسىندا كەدەن تەرمينالى اشىلماق. 6 گەكتاردى اۋماقتى قامتىپ جاتقان نىسان زاماناۋي تەكسەرۋ، راسىمدەۋ قۇرىلعىلارىمەن جابدىقتالعان.
سونىمەن قاتار، كەشە وزبەكستان اۋعانستاننىڭ ۋاقىتشا ۇكىمەتىمەن جۇك تاسىمالداۋشىلاردان الىناتىن تولەم سوماسىن تومەندەتۋدى كوزدەيتىن كەلىسىم جاسادى.
اۆتور
ءاليحان اسقار
