قازاقستان مەن تاجىكستان پارلامەنتارالىق ىنتىماقتاستىقتى نىعايتۋعا مۇددەلى

Фото:  Н.Байбулин/Сенат
Фото: Н.Байбулин/Сенат

استانا. KAZINFORM - سەنات سپيكەرى ماۋلەن اشىمبايەۆ تاجىكستاننىڭ مادجليسي ولي مادجليسي ميللي ءتوراعاسىنىڭ ءبىرىنشى ورىنباسارى رادجاببوي احمادزودامەن كەزدەستى.

سۇحبات بارىسىندا تاراپتار ەكىجاقتى قارىم-قاتىناستاردى جانە پارلامەنتارالىق ىنتىماقتاستىقتى ودان ءارى نىعايتۋ ماسەلەلەرىن تالقىلادى. بۇل تۋرالى ق ر پارلامەنتىنىڭ سەناتى باسپا ءسوز قىزمەتى مالىمدەدى.

ماۋلەن اشىمبايەۆ تاجىكستان قازاقستاننىڭ ستراتەگيالىق سەرىكتەسى جانە ماڭىزدى وداقتاسى ەكەنىن اتاپ ءوتتى. كەزدەسۋدە مەملەكەت باسشىلارىنىڭ جەكە دوستىق پەن سەنىمگە نەگىزدەلگەن بايلانىسى مەن سىندارلى ديالوگى وسىنداي ءتيىمدى ىنتىماقتاستىقتىڭ كەپىلى ەكەنى ءسوز بولدى.

سونداي-اق سەنات ءتوراعاسى ەكى ەل پارلامەنتتەرىنىڭ پالاتالارى اراسىنداعى ىنتىماقتاستىق جونىندەگى كوميسسيانىڭ ءبىرىنشى وتىرىسىنا نازار اۋدارىپ، ونىڭ قورىتىندىسى بويىنشا قول قويىلعان پارلامەنتارالىق ىنتىماقتاستىقتى دامىتۋ جونىندەگى جول كارتاسى اياسىندا ءوزارا ءىس-قيمىلدى ارتتىرۋدىڭ ماڭىزى زور ەكەنىن ايتتى.

«ەلدەرىمىز اراسىنداعى قارىم- قاتىناس بارلىق سالادا قارقىندى دامىپ كەلەدى. ستراتەگيالىق بايلانىسىمىزدى ودان ءارى ارتتىرۋدىڭ ماڭىزدى تەتىكتەرىنىڭ ءبىرى پارلامەنتارالىق ىنتىماقتاستىقتى نىعايتۋ ەكەنى انىق. پارلامەنتتەرىمىزدىڭ پالاتالارى اراسىنداعى ىنتىماقتاستىق جونىندەگى كوميسسيانىڭ ەكىنشى وتىرىسى بارىسىندا بەلگىلەنگەن مىندەتتەر الداعى بىرلەسكەن جۇمىسىمىزدا ايرىقشا مانگە يە. ولار كليماتتىڭ وزگەرۋىنە قارسى كۇرەس، سۋ رەسۋرستارىن ءتيىمدى پايدالانۋ جانە باسقا دا ماسەلەلەردە ءوزارا سەرىكتەستىكتى نىعايتا تۇسەدى دەپ سەنەمىز»، - دەدى ماۋلەن اشىمبايەۆ.

كەزدەسۋ بارىسىندا تاراپتار ساۋدا- ەكونوميكالىق، كولىك-لوگيستيكالىق جانە مادەني-گۋمانيتارلىق سالالارداعى ءوزارا ءىس-قيمىلدى دامىتۋ ماسەلەلەرىنە دە نازار اۋداردى.

ءوز كەزەگىندە رادجاببوي احمادزودا كەزدەسۋ ءۇشىن ماۋلەن اشىمبايەۆقا العىسىن ءبىلدىرىپ، الداعى ۋاقىتتا پارلامەنتارالىق ىنتىماقتاستىقتى ودان ءارى نىعايتۋعا مۇددەلى ەكەنىن جەتكىزدى.

سونىمەن قاتار سۇحبات كەزىندە تاراپتار ХХІ عاسىردا ورتالىق ازيانى دامىتۋ ماقساتىندا دوستىق، تاتۋ كورشىلىك جانە ىنتىماقتاستىق تۋرالى شارت جونىندە پىكىر الماستى. اتالعان قۇجات شولپان-اتا قالاسىندا وتكەن ورتالىق ازيا مەملەكەتتەرى باسشىلارىنىڭ IV كونسۋلتاتيۆتىك كەزدەسۋىندە كەلىسىلگەن بولاتىن.

سوڭعى جاڭالىقتار