قازاقستان مەن گەرمانيا قاي سالالاردا بىرلەسكەن جوبالار جاسايدى

قازاقستان مەن گەرمانيانىڭ ءىرى جانە ورتا بيزنەستەرى اراسىندا ماڭىزدى كوممەرتسيالىق كەلىسىمدەر بەكىتىلدى، دەپ حابارلايدى قازاقپارات.

قاسىم-جومارت توقايەۆ گەرمانيا فەدەراتيۆتىك رەسپۋبليكاسىنا رەسمي ساپارمەن باردى جانە فەدەرالدىق كانتسلەر ولاف شولتسپەن كەلىسسوزدەردەن كەيىن تىلشىلەرمەن باسپا ءسوز ءماسليحاتىن وتكىزدى.

«بۇگىنگى كەزدەسۋدە گاز، حيميا، مەتاللۋرگيا، كولىك، لوگيستيكا سالالارىندا بىرلەسكەن جوبالاردى ىسكە اسىرۋ ماسەلەلەرىن جان-جاقتى تالقىلادىق. مەنىڭ ساپارىمنان كەيىن ءىرى جانە ورتا نەمىس بيزنەسىنىڭ كوشباسشىلارىمەن ءبىرقاتار كەزدەسۋلەر وتكىزۋ قاراستىرىلعان»، - دەدى قاسىم-جومارت توقايەۆ گەرمانيادا تىلشىلەرگە بەرگەن باسپا ءسوز ءماسليحاتىندا.

پرەزيدەنتتىڭ ايتۋىنشا، بۇگىنگى كەزدەسۋ قارساڭىندا Siemens، Deutsche Bank، Siemens Energy، Linde PLC سىندى نەگىزگى سەرىكتەستەرمەن ماڭىزدى كوممەرتسيالىق كەلىسىمدەرگە قول قويىلعان.

«بۇل قۇجاتتار مەملەكەتتەرىمىز اراسىنداعى ەكونوميكالىق بايلانىستاردى ودان ءارى نىعايتۋعا ەلەۋلى سەرپىن بەرۋگە باعىتتالعان»، - دەدى مەملەكەت باسشىسى.