قازاقستان مەن رۋاندا كولىك-لوگيستيكا جانە ساۋدا سالاسىندا بىرلەسكەن جۇمىس توپتارىن قۇرۋعا كەلىستى
استانا. KAZINFORM - قازاقستان مەن رۋانادا كولىك- لوگيستيكا جانە ساۋدا سالاسىندا بىرلەسكەن جۇمىس توپتارىن قۇرۋعا كەلىستى. بۇل تۋرالى اقوردادا رۋاندا پرەزيدەنتى پول كاگامەمەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.
- قازاقستان وسى ايماقتاعى ەلدەرمەن تىعىز قارىم-قاتىناس ورناتۋعا ەرەكشە ءمان بەرىپ وتىر. ءبىز رۋاندانى افريكاداعى سەنىمدى سەرىكتەسىمىزدىڭ ءبىرىن رەتىندە قاراستىرامىز. سونداي-اق ءوزارا ارىپتەستىكتى ودان ءارى نىعايتۋعا مۇددەلىمىز. بۇگىنگى كەزدەسۋ مازمۇندى ءارى ماعىنالى بولدى. ءبىز ەكى جاقتى ىنتىماقتاستىقتى كۇشەيتۋ جولدارىن تالقىلادىق. ناقتى كەلىسىمدەرگە قول جەتكىزدىك. ەكى ەل اراسىنداعى ساياسي ديالوگتى دامىتۋعا ۋاعدالاستىق. الداعى ۋاقىتتا سىرتقى ىستەر مينيسترلىكتەرى جوعارى دەڭگەيدەگى كەزدەسۋلەر وتكىزەتىن بولدى، - دەدى مەملەكەت باسشىسى.
سونىمەن قاتار مەملەكەت باسشىسى بيىل ءساۋىر ايىندا قازاقستان مەن رۋاندا ديپلوماتيالىق جانە قىزمەتتىك ءتولقۇجات يەلەرىن ۆيزالىق تالاپتاردان بوساتۋعا كەلىسكەنىن ەسكە سالدى.
- مۇنى ريزاشىلىقپەن اتاپ وتكىم كەلەدى. بۇگىنگى كەزدەسۋدە پارلامەنتارالىق ديپلوماتيا ماسەلەسىن دە پىسىقتادىق. ونىڭ الەۋەتىن بارىنشا پايدالانۋ قاجەت. سونداي-اق ءبىز كولىك-لوگيستيكا جانە ساۋدا سالاسىندا بىرلەسكەن جۇمىس توپتارىن قۇرۋعا كەلىستىك. سول ارقىلى ساۋدا- ەكونوميكالىق قاتىناستاردى ودان ارى دامىتۋعا بولادى. بۇل رەتتە حالىقارالىق دالىزدەردىڭ مۇمكىندىگىن تالقىلادىق، - دەدى قاسىم-جومارت توقايەۆ.
بۇعان دەيىن حابارلانعانداي، قازاقستان افريكا ەلدەرىمەن بايلانىستى كۇشەيتۋگە باسا ءمان بەرەدى.
