قازاقستان مەن قىتاي تەحنيكالىق جانە كاسىپتىك ءبىلىم بەرۋدە ءوزارا ىنتىماقتاستىق ماسەلەلەرىن تالقىلادى
استانا. KAZINFORM – ق ر وقۋ- اعارتۋ ءمينيسترى عاني بەيسەمبايەۆ ق ح ر ءبىلىم ءمينيسترى حۋاي جينپەنمەن كەزدەستى، دەپ حابارلايدى مينيسترلىكتىڭ باسپا ءسوز قىزمەتى.
ەكى تاراپ تەحنيكالىق جانە كاسىپتىك ءبىلىم بەرۋ سالاسىندا قازاقستان- قىتاي ىنتىماقتاستىعىن نىعايتۋ ماسەلەلەرىن تالقىلادى.
اتاپ ايتقاندا، كەزدەسۋدە قوس ديپلومدىق ءبىلىم بەرۋ مەن بىرلەسكەن ءبىلىم بەرۋ باعدارلامالارىن جۇزەگە اسىرۋ، ەكى ەلدىڭ ستۋدەنتتەرى مەن وقىتۋشىلارىنىڭ تاعىلىمدامادان ءوتۋى، كوللەدجدەردى يننوۆاتسيالىق دامىتۋ بويىنشا ءبىرقاتار جوبانى جۇزەگە اسىرۋ تۋرالى ايتىلدى.
«قازاقستان ۇكىمەتى ەڭبەك نارىعىندا سۇرانىسقا يە ماماندىقتار بويىنشا بىلىكتى مامان دايىنداۋعا اسا كوڭىل بولۋدە. بۇگىندە تەحنيكالىق جانە كاسىپتىك ءبىلىم بەرۋ ۇيىمدارىندا قازاقستاندىق ستۋدەنتتەردىڭ %65 عا جۋىعى تەگىن ءبىلىم الۋدا. كاسىپورىنداردىڭ تاپسىرىسى بويىنشا جۇمىسقا ورنالاستىرۋ مىندەتتەمەسىمەن كادرلاردى ماقساتتى ازىرلەۋ، سونداي-اق ەلىمىزدىڭ ءاربىر ماكرووڭىرىنىڭ تاپسىرىسى بويىنشا كوللەدجدەردى بەيىندەۋ جۇرگىزىلۋدە. قازاقستاندىق كوللەدجدەر حالىقارالىق اككرەديتاتسيالاۋدان وتۋدە. ءبىز بۇل باعىتتاعى جۇمىستى ءالى دە كۇشەيتۋدى كوزدەپ وتىرمىز»، - دەدى عاني بەيسەمبايەۆ.
ەستەرىڭىزگە سالا كەتەيىك، ەلىمىزدە 772 كوللەدجدە 540 مىڭنان استام ستۋدەنت ءبىلىم الۋدا. سوڭعى بەس جىل ىشىندە مەملەكەتتىك تاپسىرىس كولەمى ەكى ەسەگە جۋىق ارتتى، ونىڭ ىشىندە 70 پايىزى تەحنيكالىق ماماندىقتارعا باعىتتالدى. 518 كاسىپورىن 410 كوللەدجدى ءوزىنىڭ قامقورلىعىنا الىپ، كەڭەس قۇرامىندا كوللەدجەردى باسقارۋعا قاتىسىپ كەلەدى. سونىمەن قاتار جۇمىسشى ماماندىقتاردىڭ مارتەبەسىن ارتتىرۋ، الەمدىك ۇزدىك كاسىبي ستاندارتتار مەن تاجىريبەلەردى ەنگىزۋ ماقساتىندا ەلىمىزدە جىل سايىن WorldSkills چەمپيوناتى وتكىزىلۋدە. وتكەن جىلى ءوز تاريحىندا تۇڭعىش رەت ءبىزدىڭ ستۋدەنتتەرىمىز EuroSkills حالىقارالىق دوداسىندا تاماشا كورسەتكىشكە قول جەتكىزدى.
