قازاقستان مەن قىتاي سۋ تاسقىنىمەن كۇرەسۋ ءۇشىن ترانسشەكارالىق وزەندەر بويىنشا اقپارات الماسۋدا
استانا. KAZINFORM - سۋ رەسۋرستارى جانە يرريگاتسيا مينيسترلىگى سۋ تاسقىنىمەن بىرلەسىپ كۇرەسۋ ءۇشىن قىتايلىق ارىپتەستەرىمەن ترانسشەكارالىق وزەندەر بويىنشا اقپارات الماسۋدا. 2005 -جىلدان بەرى قازاقستان مەن ق ح ر اراسىندا ترانسشەكارالىق وزەندەردەگى تابيعي اپاتتار تۋرالى شۇعىل حابارلاۋ تۋرالى كەلىسىم بار.
ق ر سۋ رەسۋرستارى جانە يرريگاتسيا مينيسترلىگى باسپا ءسوز قىزمەتىنىڭ حابارلاۋىنشا، تاراپتار ءبىر- بىرىنە سۋ تاسقىنى، مۇز قوزعالىسى مەن قۇبىلىستارى تۋرالى اقپارات بەرۋگە مىندەتتى. ىلە وزەنىندەگى «سانداوحەتسزى»، ەرتىس وزەنىندەگى «نانۆان» جانە تەكەس وزەنىندەگى «تەكەس» سۋ بەكەتتەرىندە باقىلاۋ جۇرگىزىلەدى.
«مينيسترلىك قىتاي، رەسەي فەدەراتسياسى جانە ورتالىق ازيا ەلدەرىنىڭ سۋ ۆەدومستۆولارىمەن ۇنەمى بايلانىستا. بارلىق ترانسشەكارالىق وزەندەر بويىنشا اقپارات الماسىپ وتىرمىز. بۇل دەرەكتەر اكىمدىكتەرگە جانە ت ج د- عا بەرىلەدى. گيدروتەحنيكالىق قۇرىلىستاردا تاۋلىك بويى كەزەكشىلىك ۇيىمداستىرىلعان. توتەنشە جاعداي تۋىنداعان جاعدايدا «قازسۋشار» جانە باسسەيندىك ينسپەكتسيالاردىڭ ماماندارى قاجەتتى ءىس- شارالاردى قابىلداۋعا دايىن»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
ەسكە سالساق، ناۋرىز ايىندا قازاقستان مەن قىتايدىڭ سۋ ۆەدومستۆولارى العاش رەت سۋ رەسۋرستارى سالاسىندا ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويدى. قۇجات سۋدى ۇتىمدى جانە تۇراقتى پايدالانۋ، زاماناۋي تەحنولوگيالاردى ەنگىزۋ، بالامالى سۋ كوزدەرىن ءبولۋ جانە ونى يگەرۋ، سونداي-اق تاجىريبە الماسۋ جانە بىرلەسىپ مامان دايارلاۋ باعىتتارىنداعى ەكىجاقتى ىنتىماقتاستىقتى نىعايتۋدى كوزدەيدى.
وسىعان دەيىن قازاقستان مەن قىتاي العاش رەت سۋ رەسۋرستارى سالاسىندا مەموراندۋمعا قول قويعانى تۋرالى حابارلاعانبىز.
