قازاقستان مەن قىتاي ءوزارا تاۋار اينالىمىن 2 ەسەگە ارتتىرادى

Фото: Александр Павский/ Kazinform
Фото: Александр Павский/ Kazinform

استانا. KAZINFORM - قازاقستان مەن قىتاي ءوزارا تاۋار اينالىمىن 2 ەسەگە ارتتىرادى. بۇل تۋرالى مەملەكەت باسشىسى قاسىم-جومارت توقايەۆپەن كەلىسسوزدەردەن كەيىنگى باسپا سوزگە ارنالعان مالىمدەمە بارىسىندا قىتاي حالىق رەسپۋبليكاسىنىڭ ءتوراعاسى شي جينپيڭ ايتتى.

«ءبىر بەلدەۋ جانە ءبىر جول» باستاماسى اياسىندا جوعارى ساپالى ىنتىماقتاستىقتى جۇزەگە اسىرىپ، پراكتيكالىق سالالارداعى ىنتىماقتاستىق بويىنشا جاڭا ناتيجەلەرگە قول جەتكىزۋگە ىقپال ەتەتىن بولامىز. قىسقا مەرزىمدە تاۋار اينالىمىن ەكى ەسەگە ارتتىرۋ ءۇشىن جاڭا مىندەت قويىلدى. ساۋدا جانە ەكونوميكا، ينۆەستيتسيالار، يندۋستريالاندىرۋ، كولىكتىك ءوزارا بايلانىس جانە ەنەرگەتيكا سياقتى ءداستۇرلى سەكتورلارداعى ىنتىماقتاستىقتى ۇزدىكسىز تەرەڭدەتۋگە كەلىستىك»، - دەدى قىتاي باسشىسى.

سونىمەن قاتار شي جينپيڭنىڭ ايتۋىنشا، ەكى ەل اراسىنداعى ساۋدا-ەكونوميكالىق ىنتىماقتاستىق باعدارلاماسىن ىسكە اسىرۋ جونىندەگى جول كارتاسى مۇقيات ىسكە اسىرىلادى. يندۋستريالاندىرۋ سالاسىنداعى ىنتىماقتاستىق جوبالار تابىستى ىلگەرىلەتىلەدى. ترانسكاسپي حالىقارالىق كولىك باعىتى مەن ەلدەرىمىز اراسىنداعى ءۇشىنشى ترانسشەكارالىق تەمىر جول قۇرىلىسى جەدەلدەتىلەدى.

«نەگىزگى مينەرالدىق رەسۋرستار، بالامالى ەنەرگيا كوزدەرى، عىلىمي جانە تەحنيكالىق يننوۆاتسيالار، اۆياتسيا جانە عارىش، سيفرلىق ەكونوميكا سالالارىندا جاڭا ءوسۋ نۇكتەلەرىن بىرلەسىپ دامىتۋعا نيەتتىمىز»، - دەدى ول.

سوڭعى جاڭالىقتار