قازاقستان مەن قىتاي اراسىنداعى ۆيزاسىز رەجيم قاشان كۇشىنە ەنەتىنى ايتىلدى

 سىرتقى ىستەر ءمينيسترىنىڭ ورىنباسارى الىبەك باقايەۆ قازاقستان مەن قىتاي اراسىنداعى ۆيزاسىز رەجيمنىڭ كۇشىنە ەنۋى تالاپتارىنا قاتىستى تۇسىنىك بەردى، دەپ حابارلايدى قازاقپارات ءتىلشىسى. 

اتاپ ايتقاندا، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاتسيالاۋ تۋرالى» زاڭى ماقۇلداندى.

سەناتتا تىلشىلەر ىشكى ىستەر ءمينيسترىنىڭ ورىنباسارى يگور لەپەحادان قازاقستان مەن قىتاي اراسىنداعى ۆيزاسىز رەجيم قاشان كۇشىنە ەنەتىنىن سۇرادى.

«قىتاي جاعى ۆيزاسىز رەجيم كۇشىنە ەنگەن جاعدايدا، ازاماتتاردىڭ ساپارلارى كۇرت ارتاتىنىن ءبىلىپ وتىر. سوندىقتان زاڭسىز كوشى-قونعا توسقاۋىل قويۋ ماقساتىندا اقپارات الماسۋ تۋرالى كەلىسىمدى راتيفيكاتسيالاۋ تۋرالى ۋاعدالاستىق جاسالدى. وسى قۇجات قابىلدانعاننان كەيىن، وسىعان دەيىن بەكىتىلگەن كەلىسىمنىڭ كۇشىنە ەنۋى ءۇشىن ءتيىستى قادامدار باستالادى»، - دەدى ي. لەپاحا.

سونىمەن قاتار، سىرتقى ىستەر ءمينيسترىنىڭ ورىنباسارى الىبەك باقايەۆ «قازاقپارات» اگەنتتىگى تىلشىسىنە قازاقستان مەن قىتاي اراسىنداعى ۆيزاسىز رەجيم بيىلدىڭ اياعىنا دەيىن كۇشىنە ەنۋى مۇمكىن ەكەنىن ايتتى.

«ەكىجاقتى شارتتار جاسالعان ەدى. قازاقستانداعى راتيفيكاتسيا جاسالعانى تۋرالى اقپارات بەرەمىز، ال قىتاي جاعى ىشكى راسىمدەرىن ىسكە اسىرىپ جاتىر. قازاقستانعا قاتىستى ۆيزاسىز رەجيمدى قىتاي جاعى بيىلدىڭ سوڭىنا دەيىن بەكىتەدى دەگەن جوسمپارىمىز بار. جالپى، وسى باعىتتا ەكى قۇجاتقا قول قويىلعان جەنە ولار ءوزارا بايلانىستى. سوندىقتان بۇگىن ماقۇلدانعان اقپارات الماسۋعا قاتىستى زاڭ كۇشىنە ەنگەننەن كەيىن، ۆيزاسىز رەجيم تۋرالى قۇجاتتىڭ دا كۇشىنە ەنۋىنە جاعداي جاسالادى. سوندىقتان جىلدىڭ اياعىنا دەيىن قىتاي جاعى دا وزىندەگى قۇجاتتاردى قاراستىرىپ ۇلگەرۋى ىقتيمال»، - دەدى ءا. باقايەۆ.

ەستەرىڭىزگە سالا كەتەيىك، قازاقستان رەسپۋبليكاسىنىڭ پرەزيدەنتى قاسىم- جومارت توقايەۆتىڭ بيىل قىتاي حالىق رەسپۋبليكاسىنا مەملەكەتتىك ساپارى اياسىندا ءبىرقاتار قۇجاتقا قول قويىلدى. ولاردىڭ اراسىندا «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم» بار.

وسىعان دەيىن قازاقستانمەن ارادا ۆيزاسىز رەجيم جونىندە قىتاي جاعىنان مەملەكەتىشىلىك راسىمدەر ءالى اياقتالماعانى حابارلانعان ەدى.

«قازاقستان مەن قىتاي ءوزارا ۆيزاسىز رەجيم تۋرالى كەلىسىمنىڭ 11-شى بابىنا سايكەس، وسى كەلىسىم بەلگىلەنبەگەن مەرزىمگە جاسالادى. ۋاعدالاسۋشى تاراپتاردىڭ ونىڭ كۇشىنە ەنۋى ءۇشىن قاجەت مەملەكەتشىلىك راسىمدەردى ورىنداعانى تۋرالى سوڭعى حابارلامانى ديپلوماتيالىق ارنالار ارقىلى العان كۇننەن باستاپ كۇنتىزبەلىك 30 كۇن وتكەن سوڭ كۇشىنە ەنەدى. ءوز كەزەگىندە، قازاقستان جاعى مەملەكەتىشىلىك راسىمدەردىڭ اياقتالعانى تۋرالى قىتايعا حابارلاما جولدادى. قىتاي تاراپىنان ءتيىستى حابارلاما ازىرگە كەلىپ تۇسكەن جوق»، - دەلىنگەن قازاقستان سىرتقى ىستەر مينيسترلىگىنىڭ «قازاقپارات» اگەنتتىگىنە بەرگەن جاۋابىندا.