قازاقستان مەن قىتاي اراسىنداعى مەديا ىنتىماقتاستىق تۇراقتى ءارى ۇزاقمەرزىمدى سيپاتقا يە - ەۆگەني كوچەتوۆ

استانا. KAZINFORM - مادەنيەت جانە اقپارات ۆيتسە-ءمينيسترى ەۆگەني كوچەتوۆ قازاقستان مەن قىتايدىڭ بىرلەسكەن مەديا جوبالار تۋرالى ايتىپ بەردى.

- تۇراقتى كەزدەسۋلەر مەن بىرلەسكەن مەديا جوبالار، ءوزارا سەرىكتەستىكتى ساقتاپ قانا قويماي، قارقىندى دامىپ، جاڭا دەڭگەيگە كوتەرىلىپ كەلە جاتقانىنىڭ ناقتى دالەلى. بۇل ەلدەرى اراسىنداعى سەنىمدى نىعايتىپ قانا قويماي، سونىمەن قاتار ءوڭىرىمىزدىڭ جانە ونىڭ شەگىنەن تىس جەرلەردەگى ورتاق باستامالاردى جۇزەگە اسىرۋ ءۇشىن كەڭ مۇمكىندىكتەر اشادى. وسى ۇدەرىستە مەديا پلاتفورمانىڭ ءرولى اسا ماڭىزدى. ىنتىماقتاستىقتى نىعايتۋدىڭ جارقىن مىسالى، جۋىردا قىتايدا وتكەن شاراعا قازاقستاندىق مەديا سالاسىنىڭ وكىلدەرى قاتىسقان وقيعا. بيىل قازاقستان دەلەگاتسياسى قىتايدىڭ چيۋيفۋ قالاسىندا وتكەن China Media Group (CMG) ۇيىمداستىرعان 4- جاھاندىق مەديا يننوۆاتسيالار فورۋمىنا قاتىستى. قازاقستان مەن قىتاي اراسىنداعى مەديا ىنتىماقتاستىق تۇراقتى ءارى ۇزاقمەرزىمدى سيپاتقا يە، كەزەڭ-كەزەڭىمەن دامىپ كەلە جاتقانىن كورسەتەدى. وسى ورايدا، ءبىز تەك اقپارات الماسۋمەن شەكتەلمەي، تولىققاندى كوممۋنيكاتسيالىق ورتانىڭ قالىپتاسىپ جاتقانىن بايقاپ وتىرمىز، - دەدى ەۆگەني كوچەتوۆ ەلوردادا ءوتىپ جاتقان «ورتالىق ازيا - قىتاي» مەديافورۋمىندا.

ۆيتسە-مينيستر سوڭعى جىلدارداعى ماڭىزدى جەتىستىكتەردىڭ ءبىرى رەتىندە حورگوس شەكارا ماڭى حالىقارالىق ىنتىماقتاستىق ورتالىعى بازاسىندا بىرلەسكەن باسپا ءسوز ورتالىعىنىڭ ىسكە قوسىلۋىن اتادى.

- مەملەكەت باسشىلارىنىڭ قوس ەل استاناسىندا مادەني ورتالىقتار قۇرۋ تۋرالى باستاماسى ەلدەرىمىز اراسىنداعى مادەني بايلانىسقا جاڭا سەرپىن بەردى. بۇل ورتالىقتار ۇلتتىق مادەنيەتتى ىلگەرىلەتۋدىڭ جانە گۋمانيتارلىق ىنتىماقتاستىقتى نىعايتۋدىڭ كوپفۋنكتسيونالدى قۇرالىنا اينالادى. سوڭعى ترەندتى ەسكەرە وتىرىپ، بۇگىندە مەديا مەن كرەاتيۆتى يندۋستريالار قارقىندى ترانسفورماتسيا كەزەڭىن باستان كەشۋدە. سيفرلاندىرۋ، پلاتفورمالىق ەكونوميكانىڭ دامۋى، جاساندى ينتەللەكتتى ەنگىزۋ جانە قولدانۋشىلىق كونتەنتتىڭ ءوسۋى مەديانىڭ تابيعاتىن، ونى تۇتىنۋ فورمالارىن جانە كاسىبي قاۋىمداستىققا قويىلاتىن تالاپتاردى تۇبەگەيلى وزگەرتۋدە، - دەيدى ول.

ونىڭ ايتۋىنشا، قازاقستان مەن قىتاي ۇلتتىق مادەنيەتتى زاماناۋي مەديا پلاتفورمالار ارقىلى ىلگەرىلەتۋگە باعىتتالعان جوبالاردى تابىستى جۇزەگە اسىرىپ كەلەدى.

- بۇگىنگى فورۋم ءبىزدىڭ ىنتىماقتاستىعىمىزدى تەرەڭدەتىپ، وسى سالادا تاجىريبە الماسۋعا قوسىمشا الاڭ بولادى دەپ سەنەمىن. كەلەسى قادام - ساپالى كونتەنت جاساۋعا باسىمدىق بەرە وتىرىپ، بىرلەسكەن مەديا ونىمدەردى بەلسەندى دامىتۋ. قازىر بىزدە ءبىرقاتار ءساتتى پرەمەرا، بىرلەسكەن ترانسلياتسيا مەن توك-شوۋلار بار. «حابار» ارناسى قىتايلىق ارىپتەستەرىمەن بىرگە تاقىرىپتىق دەرەكتى فيلم ءتۇسىرىپ جاتىر. ب ا ق جانە مادەني باعدارلامالار سالاسىنداعى بىرلەسكەن جوبالاردى ودان ءارى ىسكە اسىرۋ، ءبىرىڭعاي اقپاراتتىق كەڭىستىكتى قالىپتاستىرۋعا جانە ءوزارا بايلانىستارىمىزدى نىعايتۋعا ىقپال ەتەدى، - دەپ قورىتىندىلادى ەۆگەني كوچەتوۆ.

بۇگىن استانادا «ورتالىق ازيا - قىتاي» مەديافورۋمى ءوتىپ جاتىر.

اۆتور 

داۋلەت ىزتىلەۋ