قازاقستان مەن قىتاي اراسىندا قوس ازاماتتىققا قارسى ءىس- قيمىل تالاپتارى ايقىندالدى
بۇگىن ءماجىلىستىڭ جالپى وتىرىسىندا «قازاقستان ۇكىمەتى مەن قىتاي ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاتسيالاۋ تۋرالى» زاڭى قابىلداندى، دەپ حابارلايدى قازاقپارات ءتىلشىسى.
كەلىسىمدى راتيفيكاتسيالاۋ قازاقستان رەسپۋبليكاسى مەن قىتاي حالىق رەسپۋبليكاسىنىڭ كوشى- قون جانە قوس ازاماتتىققا قارسى ءىس- قيمىل سالاسىنداعى قۇزىرەتتى ورگاندارى اراسىنداعى ىنتىماقتاستىق ءۇشىن قۇقىقتىق نەگىز قالىپتاستىرۋعا مۇمكىندىك بەرەدى.
وسى قۇجات كوشى- قون سالاسىندا اقپارات الماسۋعا ارنالعانىنا توقتالعان ىشكى ىستەر ءمينيسترى ەرجان سادەنوۆ: «بۇل مالىمەتتەر قوس ازاماتتىققا قارسى كۇرەس، زاڭسىز كوشى- قون ارنالارىنىڭ جولىن كەسۋ تۇرعىسىندا قاجەت. شارتتى ىسكە اسىراتىن قۇزىرەتتى ورگاندار رەتىندە قازاقستان جاعىنان ىشكى ىستەر مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگى، ال قىتايدان سىرتقى ىستەر مينيسترلىگى مەن كوشى- قون ىستەرى جونىندەگى مەملەكەتتىك باسقارما بەلگىلەندى»، - دەدى.
ونىڭ ايتۋىنشا، قازىرگى كەزدە وسىنداي ەكىجاقتى كەلىسىم بەس مەملەكەتپەن بەكىتىلگەن.
كەلىسىم قازاقستان مەن قىتاي ازاماتتارىنا قاتىستى كوشى- قون سالاسىندا اقپارات الماسۋ بويىنشا ءوزارا ءىس- قيمىلدى رەتتەيدى. قۇجاتتى راتيفيكاتسيالاۋ ەكى ەل اراسىنداعى ەكىجاقتى ىنتىماقتاستىقتى ودان ءارى دامىتۋعا جانە نىعايتۋعا ىقپال ەتەدى.
