قازاقستان مەن قاتار اسكەري ىنتىماقتاستىقتى نىعايتادى - زاڭ
استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن قاتار مەملەكەتىنىڭ ۇكىمەتى اراسىنداعى اسكەري ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭى قابىلداندى.
«كەلىسىمگە 2023-جىلعى 12-جەلتوقساندا دوحادا ەكى ەلدىڭ قورعانىس ۆەدومستۆوسىنىڭ باسشىلارى قول قويدى. قاتار ءبىزدىڭ ەلىمىزدىڭ سول وڭىردەگى ماڭىزدى ساياسي جانە ەكونوميكالىق سەرىكتەسى سانالادى. مۇنىمەن قوسا، اسكەري ىنتىماقتاستىق سياقتى پەرسپەكتيۆالى باعىتتار بار. كەلىسىمدى راتيفيكاتسيالاۋ تاراپتارعا اسكەري ءبىلىم بەرۋ مەن عىلىم، اسكەري مەديتسينا، بەيبىتشىلىكتى قولداۋ جونىندەگى وپەراتسيالار، جاۋىنگەرلىك دايارلىق بايلانىستارىن، سونداي-اق كەلىسىلگەن سالالاردا اسكەري ىنتىماقتاستىقتى جۇزەگە اسىرۋ مۇمكىندىگىن بەرەدى»، - دەدى ق ر قورعانىس ءمينيسترىنىڭ ورىنباسارى دارحان احمەديەۆ.
ونىڭ ايتۋىنشا، قازاقستاننىڭ حالىقارالىق شارتتار تۋرالى زاڭىنا سايكەس اتالعان كەلىسىم راتيفيكاتسيالانۋى ءتيىس. اتالعان زاڭدى قابىلداۋ تەرىس الەۋمەتتىك-ەكونوميكالىق جانە قۇقىقتىق سالدارعا اكەپ سوقپايدى.
ايتا كەتەيىك، بيىل جازدا قازاقستان مەن ازەربايجاننىڭ قورعانىس مينيسترلەرى اسكەري ىنتىماقتاستىق تۋرالى كەلىسىمگە قول قويدى.
