قازاقستان مەن جاپونيا سۋ تاسقىنىنا قارسى كۇرەستى كۇشەيتۋ ءۇشىن گرانت بولۋگە كەلىستى
استانا. KAZINFORM - سۋ رەسۋرستارى جانە يرريگاتسيا مينيسترلىگى جاپونيا ۇكىمەتىمەن بوگەتتەردى كەشەندى باسقارۋ ارقىلى قازاقستانداعى سۋ تاسقىنىنا قارسى شارالاردى جاقسارتۋ جوباسىن جۇزەگە اسىرۋ ءۇشىن 2 ميلليون دوللار كولەمىندە گرانت بولۋگە كەلىستى.
جوبا ەلىمىزدىڭ سۋ تاسقىنىنا توزىمدىلىگىن ارتتىرۋعا جانە بوگەت قاۋىپسىزدىگىن نىعايتۋعا باعىتتالعان. جوبانىڭ اياقتالۋ مەرزىمى - 2027 -جىل. ەسكە سالا كەتەيىك، بىلتىر جازدا جاپونيانىڭ حالىقارالىق ىنتىماقتاستىق اگەنتتىگىنىڭ (JICA) ساراپشىلارى تاسقىن كەزىندە ەڭ كوپ زارداپ شەككەن قازاقستاننىڭ 4 وڭىرىندەگى 13 سۋ شارۋاشىلىعى نىسانىنا زەرتتەۋ جۇرگىزگەن بولاتىن. سونداي-اق JICA قولداۋىمەن «قازسۋشار» كاسىپورنىنىڭ بىرنەشە مامانى جاپونيادا بىلىكتىلىكتى ارتتىرۋ كۋرستارىنان ءوتتى.
- سۋ رەسۋرستارى جانە يرريگاتسيا مينيسترلىگى قۇرىلعان ساتتەن باستاپ قازاقستان مەن جاپونيا اراسىنداعى ىنتىماقتاستىق ەداۋىر نىعايدى. ءبىز ىنتىماقتاستىعىمىزدى جالعاستىرۋعا نيەتتىمىز. جاپونيانىڭ سۋ تاسقىنىنا قارسى كۇرەستە تاجىريبەسى مول جانە سۋ رەسۋرستارىن باسقارۋ سالاسىندا بىرەگەي تەحنولوگيالارى بار. بۇل ەلىمىز ءۇشىن وتە پايدالى بولۋى مۇمكىن، - دەدى سۋ رەسۋرستارى جانە يرريگاتسيا ءمينيسترى اسلان ابدرايموۆ.
