قازاقستان مەن فرانسيا پرەزيدەنتتەرى شاعىن قۇرامدا كەلىسسوز جۇرگىزدى

 مەملەكەت باسشىسى قاسىم-جومارت توقايەۆ اقوردادا قازاقستانعا رەسمي ساپارمەن كەلگەن فرانسيا پرەزيدەنتى ەممانيۋەل ماكرونمەن كەلىسسوز جۇرگىزدى، دەپ حابارلايدى Kazinform. 

كەلىسسوز الدىندا قاسىم-جومارت توقايەۆ پەن ەممانيۋەل ماكرون ءبىر-بىرىنە رەسمي دەلەگاتسيا مۇشەلەرىن تانىستىردى. قۇرمەت قاراۋىلىنىڭ باستىعى مەملەكەتتەر باسشىلارىنا راپورت بەرىپ، ەكى ەلدىڭ ءانۇراندارى شىرقالدى. سودان كەيىن پرەزيدەنتتەر شاعىن قۇرامدا كەلىسسوز جۇرگىزۋ ءۇشىن شىعىس زالىنا باردى.

قاسىم-جومارت توقايەۆ ەممانيۋەل ماكرونعا ءىلتيپات ءبىلدىرىپ، جىلى قارسى الدى.

- پرەزيدەنت مىرزا، ءبىز ءۇشىن بۇگىن ۇلكەن وقيعا. ءسىزدىڭ ساپارىڭىزدى ءبارىمىز قۇپتايمىز. مەنىڭ شاقىرۋىمدى قابىل الىپ، قازاقستانعا رەسمي ساپارمەن كەلگەنىڭىز ءۇشىن العىس ايتامىن. قازاقستان مەن فرانسيا اراسىنداعى ىنتىماقتاستىق جاقسى دامىپ كەلە جاتىر. دەگەنمەن ەكىجاقتى قارىم-قاتىناسقا تىڭ سەرپىن بەرۋ كەرەك. سوندىقتان ءسىزدىڭ ساپارىڭىزدى تاريحي، وتە ماڭىزدى دەپ ايتۋعا بولادى. بۇگىنگى كەلىسسوزدەر ناتيجەلى بولاتىنىنا سەنىمدىمىن. وعان ەشقانداي كۇمانىم جوق، - دەدى پرەزيدەنت.

مەملەكەت باسشىسى فرانسيا قازاقستاننىڭ ەۋروپا وداعىنداعى باستى جانە سەنىمدى سەرىكتەسى، سونداي-اق ەل ەكونوميكاسىنىڭ ءىرى ينۆەستورىنىڭ ءبىرى ەكەنىن اتاپ ءوتتى.

ءوز كەزەگىندە ەممانيۋەل ماكرون قازاقستان مەن فرانسيا اراسىنداعى بايلانىستارعا جوعارى باعا بەردى.