قازاقستان مەن پاكىستاننىڭ ۇكىمەت باسشىلارى ساۋدا-ەكونوميكالىق ىنتىماقتاستىقتى نىعايتۋ ماسەلەلەرىن تالقىلادى
استانا. KAZINFORM - قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ شاڭحاي ىنتىماقتاستىق ۇيىمىنا مۇشە مەملەكەتتەر ۇكىمەتتەرى باسشىلارى كەڭەسىنىڭ وتىرىسىنا قاتىسۋ ءۇشىن يسلاماباد قالاسىنا باردى.
بارعان ساتتە پاكىستان پرەمەر-ءمينيسترى شاحباز شاريفپەن كەزدەسۋ ءوتتى. ەكىجاقتى ساۋدا- ەكونوميكالىق ىنتىماقتاستىقتىڭ قازىرگى جاعدايى مەن ودان ءارى دامۋ پەرسپەكتيۆالارى، سونداي-اق سيفرلاندىرۋ سالاسىنداعى ءوزارا ءىس-قيمىل تالقىلاندى.
ولجاس بەكتەنوۆ مەملەكەت باسشىسى قاسىم-جومارت توقايەۆ قازاقستان مەن پاكىستان اراسىنداعى ەكونوميكالىق كووپەراتسيا الەۋەتىنە ەرەكشە نازار اۋداراتىنىن اتاپ ءوتتى. بيىلعى 8 ايدىڭ قورىتىندىسى بويىنشا ەكىجاقتى تاۋار اينالىمى %16- عا ءوسىپ، شامامەن $40 ميلليوندى قۇرادى. قولدانىستاعى الەۋەتتى اشۋ ءۇشىن تاراپتار تاۋار اينالىمىن ءارتاراپتاندىرۋدى جالعاستىرۋعا نيەتتى. قازاقستان پاكىستان نارىعىنا جالپى قۇنى $490 ميلليوننان اساتىن 85 تاۋار ءتۇرى بويىنشا جەتكىزۋ كولەمىن ارتتىرۋعا، ونىڭ ىشىندە جەتكىزىلەتىن مۇناي- حيميا، مەتاللۋرگيا، حيميا، فارماتسيەۆتيكا سالالارىنىڭ، سونداي-اق تاماق ونەركاسىبى مەن ماشينا جاساۋ ونىمدەرىنىڭ نومەنكلاتۋراسىن كەڭەيتۋگە دايىن.
سونىمەن قاتار اۋىل شارۋاشىلىعى سالاسىنداعى ىنتىماقتاستىققا نازار اۋدارىلدى. بيىلعى قاڭتار-تامىزدا قازاقستاندىق اۋىل شارۋاشىلىعى ونىمدەرىن جەتكىزۋ كولەمى 2 ەسەگە جۋىق ءوسىپ، $7,7 ميلليوندى قۇرادى. قازاقستاننان اكەلىنەتىن كوكونىستەر مەن ءداندى داقىلدار پاكىستان نارىعىندا سۇرانىسقا يە. بيىل كۇتىلەتىن جوعارى ءونىمدى ەسكەرە وتىرىپ، قازاقستان ۇكىمەتى پاكىستانعا ءداندى داقىلدار جەتكىزۋ كولەمىن جىل سايىن 2 ميلليون تونناعا دەيىن ارتتىرۋعا دايىن.
ترانزيتتىك- كولىك سالاسىندا تەمىرجول جۇك تاسىمالى كولەمىنىڭ ءۇش ەسەگە ارتۋى جانە اۆتوموبيل كولىگىمەن ترانزيتتىك تاسىمالدىڭ ءتورت ەسەگە ءوسۋى اياسىندا ۇكىمەتتەر باسشىلارى قولدانىستاعى «قازاقستان-وزبەكستان-اۋعانستان-پاكىستان» مۋلتيمودالدى باعىتىن جانە «قازاقستان- تۇرىكمەنستان-اۋعانستان-پاكىستان» جاڭا كولىك ءدالىزىن ودان ءارى دامىتۋ پەرسپەكتيۆالارىن تالقىلادى.
ەكى ەل ساۋدا-ەكونوميكالىق جانە مادەني-گۋمانيتارلىق قاتىناستاردىڭ بارلىق سپەكترى بويىنشا ءوزارا ءىس-قيمىلدى كەڭەيتۋدى جالعاستىرادى.
اۆتور
اسحات رايقۇل
