قازاقستان كومىرى قاي ەلدەرگە ەكسپورتتالادى
استانا. KAZINFORM - بيىل ەلىمىزدە 129 ميلليون تونناعا جۋىق كومىر ءوندىرۋ جوسپارلانىپ وتىر. بۇل تۋرالى ۇكىمەت وتىرىسىندا ەنەرگەتيكا ءمينيسترى ەرلان اقكەنجەنوۆ ايتتى.
- كومىر ونەركاسىبى ەلىمىزدىڭ ەنەرگەتيكالىق قاۋىپسىزدىگى ءۇشىن نەگىزگى مانگە يە. قازاقستاندا كومىردىڭ ايتارلىقتاي قورى بار جانە ول بويىنشا الەمدە 10- ورىندا تۇر. قازىرگى كەزدەگىدەي ءوندىرۋ كولەمى بولعان جاعدايدا، كومىر قورى 300 جىلدان استام ۋاقىتقا جەتەدى. كومىردىڭ ءىرى كەن ورىندارى: ورتالىق قازاقستاندا ورنالاسقان قاراعاندى كومىر باسسەينى، تورعاي كومىر باسسەينى، شۇباركول، جالىن كەن ورىندارى. سولتۇستىك-شىعىس ءوڭىرى: ەكىباستۇز كومىر باسسەينى، مايكۇبى كومىر باسسەينى، قاراجىرا كەن ورنى. ەلىمىزدەگى كومىر قورى 33,6 ميلليارد توننا، - دەدى مينيستر.
ونىڭ ايتۋىنشا، سالا ىشكى نارىقتى تۇراقتى جابدىقتاۋدى جانە ەكسپورتتىق جەتكىزىلىمدەردى ۇلعايتۋدى قامتاماسىز ەتە وتىرىپ، كومىر ءوندىرىسىنىڭ ءوسۋىن كورسەتۋدە. وندىرىلەتىن كومىردىڭ نەگىزگى بولىگى ىشكى نارىققا جىبەرىلەدى جانە ەلەكتر ەنەرگەتيكاسىندا، كوممۋنالدىق-تۇرمىستىق سەكتور مەن ونەركاسىپتە پايدالانىلادى. كومىر ەكسپورتتاۋ دەڭگەيى ساقتالىپ وتىر.
- 2025 -جىلدىڭ قورىتىندىسى بويىنشا كومىر ءوندىرۋ شامامەن 115,9 ميلليون توننا بولدى نەمەسە 2024 -جىلمەن سالىستىرعاندا 7 پايىزعا ءوستى. كوممۋنالدىق-تۇرمىستىق ماقساتتارعا جانە ىشكى تۇتىنۋعا 85,9 ميلليون توننا پايدالانىلدى، ال كومىر ەكسپورتتاۋ 30 ميلليون تونناعا جەتتى. كومىر ەكسپورتتاۋدىڭ نەگىزگى باعىتتارى: رەسەي فەدەراتسياسى، پولشا، وزبەكستان، تۇركيا، ءۇندىستان جانە مالايزيا جانە تاعى باسقالارى. 2026-جىلى 128,9 ميلليون توننا دەڭگەيىندە كومىر ءوندىرۋ جوسپارلانادى، - دەدى ەرلان اقكەنجەنوۆ.
ايتا كەتەلىك 2030-جىلعا دەيىن كومىر گەنەراتسياسى قالاي وزگەرەتىنى تۋرالى جازعان
