قازاقستان كوكتەمگى سۋ تاسقىنى سالدارىن وزگەنىڭ كومەگىنسىز ەڭسەرە الدى - پرەزيدەنت
استانا. KAZINFORM - قازاقستان كوكتەمگى سۋ تاسقىنى سالدارىن وزگەنىڭ كومەگىنسىز ەڭسەرە الدى.
بۇل تۋرالى اەس بويىنشا رەفەرەندۋمدا داۋىس بەرگەننەن كەيىن باق وكىلدەرىنە شاعىن سۇحبات بەرگەن مەملەكەت باسشىسى قاسىم-جومارت توقايەۆ ايتتى.
«بيىل كوكتەمدە ەلىمىز تەڭدەسسىز سۋ تاسقىنىنا تاپ بولدى جانە وڭىرلەردىڭ اپاتقا تولىقتاي دايىن ەمەستىگى ءبىلىندى. وسى وقيعادان كەيىن قانداي دا ءبىر قورىتىندى جاسالدى ما؟»، - دەپ سۇرادى ب ا ق وكىلدەرى پرەزيدەنتتەن.
مەملەكەت باسشىسى مۇنداي تابيعي اپات تەك ەلىمىزدە عانا ەمەس، الەمنىڭ ءبىرقاتار وڭىرىندە بولعانىنا نازار اۋدارتتى.
«قورىتىندى جاسالدى. دەگەنمەن، مۇنداي تابيعي اپات جەر شارىنىڭ بارلىعىن دەرلىك شارپىعانىنا نازار اۋدارىڭىزدار. تاياۋدا عانا ورتالىق ەۋروپادا ۇلكەن سۋ تاسقىنى ورىن الدى. وعان دەيىن ا ق ش- تا وتە ۇلكەن داۋىل سوقتى، ۆەتنامدا دا بولدى. مۇنداي تابيعي اپاتتى بولجاۋ وتە قيىن، ءبىراق، ءبىز وعان دايىنبىز جانە الدىن الۋ شارالارىن مىندەتتى تۇردە قابىلداۋ قاجەت. سوندىقتان دا شارالار قابىلداندى. بايقاساڭىزدار، قازاقستان بۇل پروبلەمانى وزگەنىڭ كومەگىنسىز ەڭسەرە الدى. ءبىز قارجىلىق دا، ادامي دا رەسۋرستاردى شوعىرلاندىرا الدىق. ۇكىمەت پەن اكىمدىكتەردىڭ بەلسەندى جۇمىسىنىڭ ارقاسىندا بارلىق سالدارىن ەڭسەرە الدىق. قالاي دەگەندە دە، سۋ تاسقىنى كەزىندە زارداپ شەككەندەر جاڭا باسپانا الدى. مۇنىڭ ۇستىنە، وسى تاسقىنعا دەيىن ولاردىڭ مۇنداي باسپاناسى بولعان ەمەس. مەن ەشكىم دە تىس قالمايتىندىعىنا ۋادە بەردىم جانە نەگىزىنەن ءبىز بۇل تاپسىرمانى ورىندادىق»، - دەدى قاسىم-جومارت توقايەۆ.
بۇعان دەيىن قاسىم-جومارت توقايەۆ اەس بويىنشا رەفەرەندۋمدا داۋىس بەرگەنىن جازعان بولاتىنبىز.
سونداي-اق تىلشىلەر سۇراعىنا وراي، ۇستازداردىڭ قوعامدىق مارتەبەسى مىندەتتى تۇردە كوتەرىلەتىنىن ايتتى.
