قازاقستان جازۋشىلار وداعى قىتاي باسپا كومپانياسىمەن كەلىسىمشارت جاسادى

قازاقستان جازۋشىلار وداعىنا Phoenix Publishing & Media Groupباسپا ديرەكتورى فان مين، Phoenix Science press پرەزيدەنتى فۋ مەي، «جياڭسۋ فەنيكس» ادەبيەت جانە ونەر باسپاسىنىڭ پرەزيدەنتى چجان تسزاي تسزيان باستاعان كومپانيانىڭ بىرنەشە وكىلى كەلدى، دەپ حابارلايدى قازاقپارات.

وداقتىڭ باسپا ءسوز قىزمەتىنەن ءمالىم ەتكەندەي، قوناقتاردى قازاقستان جازۋشىلار وداعى باسقارما ءتوراعاسىنىڭ ورىنباسارى عالىم قاليبەك ۇلى قارسى الىپ، جازۋشىلار وداعىنىڭ تاريحىمەن، قازىرگى اتقارىپ جاتقان جۇمىستارى، كەلەشەكتەگى جوسپارلارى جايىندا بايانداپ بەردى.

كەزدەسۋ بارىسىندا، قوناقتار قىتاي قالامگەرلەرىنىڭ «التىن وزەن» (لۋ مين)، «باللادا» (ۆان ياو)، «چجۋنگۋانتسۋنداعى سەرگەلدەڭ» (سيۋي تسزەچەن)، «جۇرەگىمنىڭ مەكەنى - دۋنحۋان» (فان تسزينشي)، «بەمبا» (ليۋ ليانچەن)، «مەنى ۇمىت» (سيۋي فەن)، «ون مىڭ قۇس ۇياسىنا ورالعاندا» (حە تسزيانمين) اتتى كىتاپتارىن قازاق تىلىنە اۋدارىپ، قازاقستاندا باسىپ شىعارۋ، تاراتۋ جونىندە ۇسىنىسىن جەتكىزدى. مۇنان تىس، ءار جىلى قازاقتىڭ بەس، قىتايدىڭ بەس قالامگەرىنىڭ شىعارمالارىن ەكى ەلدە جارىققا شىعارىپ وتىرۋعا ۋاعدالاستى.

ايتا كەتۋ كەرەك، Phoenix Publishing & Media Group - قىتايداعى جاھاندىق رەيتينگتە 10-ورىندا تۇرعان ەڭ ءىرى باسپا كورپوراتسياسى.

كەزدەسۋ سوڭىندا قازاقستان جازۋشىلار وداعى مەن Yilin Press Ltd كومپانياسى 5 جىلدىق ىنتىماقتاستىق تۋرالى كەلىسىمشارتقا قول قويدى.