قازاقستان جاستارى كليماتتىڭ وزگەرۋى تۋرالى ب ۇ ۇ- عا مالىمدەمە جىبەرەدى
استانادا نازاربايەۆ ۋنيۆەرسيتەتىندە قازاقستانداعى كليماتتىڭ وزگەرۋى بويىنشا جەرگىلىكتى جاستار كونفەرەنتسياسى (LCOY Kazakhstan 2023) ءوتىپ جاتىر، دەپ حابارلايدى قازاقپارات ءتىلشىسى.

LCOY Kazakhstan 2023 – ب ۇ ۇ كليماتتىڭ وزگەرۋى جونىندەگى نەگىزدەمەلىك كونۆەنتسياسى جانە ورنىقتى دامۋ سالاسىندا شەشىمدەر ازىرلەۋ جەلىسىنىڭ (SDSN) نەگىزگى ءىس-شاراسى. جىل سايىنعى كونفەرەنتسيا كليماتتىڭ وزگەرۋى جانە تۇراقتى دامۋ سالاسىنداعى مازمۇندى ديالوگتار مەن بىرلەسكەن ءىس-ارەكەتكە قاتىسۋ ءۇشىن قازاقستاننىڭ ءتۇرلى ايماقتارىنان جاس كوشباسشىلاردىڭ، زەرتتەۋشىلەر مەن ساراپشىلاردىڭ باسىن قوسادى.
SDSN Youth Kazakhstan - قازاقستان جاستارى اراسىندا ب ۇ ۇ تۇراقتى دامۋ ماقساتتارىن ىلگەرىلەتۋگە باعىتتالعان سەرپىندى جاستار باستاماسى. ول 2022-جىلدىڭ ماۋسىم ايىندا نازاربايەۆ ۋنيۆەرسيتەتىندە باستاۋ العان.
«ءبىزدىڭ ماقساتىمىز - تۇراقتى دامۋدىڭ 17 ماقساتىنا جەتۋ ءۇشىن شەشىمدەردى انىقتاۋعا جانە ازىرلەۋگە كومەكتەسۋ. قازاقستانداعى جەلىمىز وتكەن جىلى پايدا بولدى، قازىر 20 عا جۋىق مەكەمە بار. العاش رەت SDSN كونفەرەنتسياسىن وتكىزدىك، وندا جاستاردىڭ قوسقان ۇلەسىنە تاڭ قالدىم. Sdsn Youth ازىرلەگەن جانە قازاقستاندا جۇزەگە اسىراتىن 4-5 پرەزەنتاتسيا مەن جوبالار بار. Sdsn Youth ازىرلەگەن كەيبىر تۇجىرىمدامالىق سۇحباتتار مەن پرەزەنتاتسيالار جانە جوبالار وزەكتى ماسەلەلەرگە ارنالدى جانە شەشىمدەرى انىقتالدى»، - دەدى قازاقستانداعى SDSN ءتوراعاسى شيگەو كاتسۋ.
بۇگىنگى جيىندا «قازاقستانداعى كليماتتىڭ وزگەرۋى»، «كليمات وزگەرىسىنىڭ سۋ سەكتورىنا اسەرىن باعالاۋ»، «قازاقستاندا جاسىل، تۇراقتى، زاماناۋي ەنەرگيانى جاپپاي ەنگىزۋ جانە پايدالانۋدىڭ ماڭىزى» تاقىرىپتارىندا پانەلدىك پىكىرتالاستار وتەدى.
سونىمەن بىرگە، كونفەرەنتسيادا ستۋدەنتتەردىڭ جاسىل جوبالارىنىڭ كورمەسى، كوركەم سۋرەت كورمەسى جانە «كليماتتىق فرەسك» ويىنى وتەدى. بۇل قاتىسۋشىلاردىڭ كليماتتىڭ وزگەرۋى جانە ونىڭ سالدارى تۋرالى ءبىلىمىن ارتتىرۋعا مۇمكىندىك بەرەدى.
«قازاقستانداعى كليماتتىڭ وزگەرۋ پروبلەمالارى جاستاردى الاڭداتىپ وتىرعانىن كورۋ وتە ماڭىزدى. سىزدەر ساياساتكەرلەر مەن ساراپشىلاردىڭ كەلەسى بۋىنى رەتىندە كليماتتىق داعدارىستى جەڭۋ شارالارىن قالىپتاستىراتىن جانە اسەر ەتە الاتىن ادام بولاسىزدار. سونداي-اق بىزگە كليمات تۋرالى پىكىرتالاستا جاستاردىڭ ءۇنىن تىڭداۋ، جاڭا تەحنولوگيالارعا قاتىستى يننوۆاتسيالىق شەشىمدەرىڭىزدى كورۋ وتە ماڭىزدى. وعان قوسا، جاھاندىق جىلىنۋدى 1,5 گرادۋسقا دەيىن شەكتەۋ ءۇشىن ۇجىمدىق كۇش-جىگەر قاجەت»، - دەدى قازاقستانداعى ە و وكىلدىگىنىڭ ءبىرىنشى كەڭەسشىسى دوكتور يوحاننەس باۋر.
LCOY Kazakhstan 2023 شاراسىنىڭ ماڭىزدى قورىتىندىسى - قازاقستاندىق جاستار دايىنداعان بىرلەسكەن مالىمدەمە بولماق. بۇل مالىمدەمە بىرىككەن اراب امىرلىكتەرىنىڭ دۋباي قالاسىندا وتەتىن ب ۇ ۇ كليماتتىڭ وزگەرۋى جونىندەگى 28-كونفەرەنتسياسىنا ۇسىنىلىپ، كليماتتىڭ وزگەرۋى بويىنشا جاھاندىق شەشىمگە بەلسەندى ىقپال ەتۋگە مۇمكىندىك بەرەدى.
«ءبىز بۇگىن جاستارعا كليماتتىڭ وزگەرۋى جونىندە اقپارات بەرىپ، وسى سالاداعى پروگرەسكە بەلسەندى قاتىسۋ ءۇشىن قاجەتتى داعدىلارمەن قامتاماسىز ەتكىمىز كەلەدى. سونىمەن بىرگە، جاستاردىڭ مالىمدەمەسىن ازىرلەيمىز، بۇل ءۇش تاقىرىپتىق باعىت بويىنشا توپتىق جۇمىستى قامتيتىن قورىتىندى قۇجات بولادى. ياعني قاتىسۋشىلار 3 توپتىق سەسسياعا بولىنەدى، ولار كليماتتىڭ وزگەرۋىنە بايلانىستى ءارتۇرلى ماسەلەلەردى قاراستىرادى. مۇنىڭ ءبارىن ۇيىمداستىرۋ كوميتەتى جيناقتاپ، قورىتىندى قۇجاتتى قاراشانىڭ اياعىندا جانە جەلتوقساننىڭ باسىندا دۋباي قالاسىندا (ب ا ءا) وتەتىن جاستار كونفەرەنتسياسىنا جىبەرەدى»، - دەدى SDSN Youth Kazakhstan باستاماسىنىڭ ۇيلەستىرۋشىسى، نازاربايەۆ ۋنيۆەرسيتەتىنىڭ 4-كۋرس ستۋدەنتى نيكيتا دۋرنيەۆ.