قازاقستان جاستارى فرانسيانىڭ تاعى 13 ۋنيۆەرسيتەتىندە تەگىن وقۋعا مۇمكىندىك الادى
عىلىم جانە جوعارى ءبىلىم ءمينيسترى ساياسات نۇربەك فرانسيا مەن قازاقستان پرەزيدەنتتەرىنىڭ اقورداداعى كەزدەسۋى الدىندا «بولاشاق» باعدارلاماسىنا جاڭا 13 ۋنيۆەرسيتەت قوسىلاتىنىن ءمالىم ەتتى، دەپ حابارلايدى Kazinform اگەنتتىگى.
«بولاشاق» باعدارلاماسى اياسىنداعى ارىپتەستىكتى ءارى قاراي كەڭەيتەمىز. وزدەرىڭىز بىلەسىزدەر، فرانسيا - ونەركاسىپ ەلى. اسىرەسە ەنەرگەتيكا، كوممۋنيكاتسيا، كومپيۋتەر عىلىمدارى، زىمىران جانە اۋە كەمەسىن قۇراستىرۋ سالالارىندا ىنتىماقتاستىقتىڭ الەۋەتى زور»، - دەدى مينيستر.
ۆەدومستۆو باسشىسى تۋلۋزا قالاسىندا Airbus كومپانياسىنىڭ شتاب- پاتەرى تۇرعانىن ەسكە سالدى.
«سوندىقتان عىلىمي- زەرتتەۋ ينستيتۋتتارىنىڭ، جوعارى وقۋ ورىندارىنىڭ، زەرتتەۋ ورتالىقتارىنىڭ سانىن كەڭەيتەمىز. سول ارقىلى ءبىزدىڭ عالىمدار، ماگيستراتتار مەن دوكتورانتتار تاعلىمدامادان وتەدى»، - دەدى ساياسات نۇربەك.
ەسكە سالايىق، فرانسيا پرەزيدەنتى قازاقستانعا مەملەكەت باسشىسى قاسىم-جومارت توقايەۆتىڭ شاقىرۋىمەن كەلدى.
ساپار اياسىندا ەكى ەل باسشىلارى ساۋدا-ەكونوميكالىق، ينۆەستيتسيالىق جانە ەنەرگەتيكالىق ىنتىماقتاستىقتى نىعايتۋ، سونداي-اق حالىقارالىق جانە وڭىرلىك كۇن تارتىبىندەگى ماسەلەلەردى تالقىلايدى دەپ جوسپارلانعان.
ايتا كەتۋ كەرەك، قازاقستان پرەزيدەنتى قاسىم-جومارت توقايەۆتىڭ فرانسياعا بىلتىر جاساعان رەسمي ساپارى اياسىندا 35 قۇجاتقا قول قويىلعان بولاتىن.
