قازاقستان جالپى قۋاتى 26 گيگاۆات بولاتىن جاڭا ەنەرگيا ءوندىرۋ نىساندارىن سالادى
استانا. KAZINFORM - ەنەرگەتيكا ءمينيسترى الماسادام ساتقاليەۆ ورتالىق ازيا ەلدەرى ەنەرگەتيكا مينيسترلەرىنىڭ كەزدەسۋىندە ەلدىڭ ەنەرگەتيكاسى جۇيەسى قانداي رەفورمالاردى باستان وتكەرىپ جاتقانىن ايتتى.
«ءوڭىردىڭ ترانزيتتىك الەۋەتى تولىق اشىلماعانىن ەسكەرسەك، ەنەرگەتيكالىق رەسۋرستار ساۋداسىنداعى ىقپالداستىقتى نىعايتۋ جۇمىستارىن بەلسەندى جۇرگىزۋ ماڭىزدى دەپ ەسەپتەيمىن. ەنەرگيامەن جابدىقتاۋدىڭ تۇراقتىلىعىن ساقتاۋ قاجەت ەكەنىن ەسكەرسەك، وڭىردەگى حالىق سانى مەن ەلەكتر قۋاتىن تۇتىنۋشىلاردىڭ سانى ۇدايى ءوسىپ كەلە جاتقانىن ەسكەرسەك، جاڭا ەنەرگەتيكالىق قۋات كوزدەرىن ەنگىزۋ كەرەك»، - دەدى مينيستر.
الماسادام ساتقاليەۆ ەلدىڭ ەنەرگەتيكا جۇيەسى كەزەكتى جاڭعىرتۋدان ءوتىپ جاتقانىن اتاپ ءوتتى.
«قازاقستان ءوز كەزەگىندە قولدانىستاعى قۋات كوزدەرىن جاڭعىرتىپ، جالپى قۋاتى 26 گيگاۆات بولاتىن جاڭا كوزدەردى سالۋدى جوسپارلاپ وتىر. زاڭناما اياسىندا سالانى دامىتۋ جوسپارلارىن جەتىلدىرىپ، وندىرىستەردى ەنەرگيا ۇنەمدەۋشى رەجيمگە كوشىرۋ ارقىلى، تاريف ساياساتىن قايتا قاراپ جاڭارتىلاتىن ەنەرگيا كوزدەرىن اشۋ ارقىلى رەفورمالاۋ جوسپارلانعان»، - دەدى ۆەدومستۆو باسشىسى.
