قازاقستان جاڭا ينۆەستورلىق ۆيزانى ەنگىزەدى
استانا. KAZINFORM — قازاقستان رەسپۋبليكاسى حالىقارالىق بيزنەسكە جاقىنداي ءتۇسۋ جولىندا تاعى ءبىر ماڭىزدى قادام جاسادى.
سىرتقى ىستەر مينيسترلىگىنىڭ باستاماسىمەن ەلىمىزدىڭ ينۆەستيتسيالىق تارتىمدىلىعىن ارتتىرۋعا جانە ۇزاق مەرزىمدى ىسكەرلىك سەرىكتەستىكتى قولداۋعا باعىتتالعان ينۆەستورلىق ۆيزانى الۋ قاعيدالارى بەكىتىلدى.
جاڭا تالاپتارعا سايكەس قازاقستان كومپانيالارىنىڭ جارعىلىق كاپيتالىنا نەمەسە وتاندىق باعالى قاعازدارعا كەمىندە 300000 ا ق ش دوللارى كولەمىندە ينۆەستيتسيا سالعان شەتەل ازاماتتارى ينۆەستورلىق ۆيزانى رەسىمدەۋ ءۇشىن ەلەكتروندى ءوتىنىش بەرە الادى. بۇل «التىن ۆيزا» قازاقستاندا 10 جىلعا دەيىن تۇرۋعا رۇقسات الۋ مۇمكىندىگىن كوزدەيدى.
- مۇنداي ۆيزالىق باعدارلامالار حالىقارالىق تاجىريبەدە (سونىڭ ىشىندە ەۋروپا ەلدەرى، ا ق ش، ب ا ءا جانە سينگاپۋردا) كەڭىنەن قولدانىلىپ، كاپيتال، تەحنولوگيا مەن ىسكەرلىك بەلسەندىلىكتى تارتۋدىڭ ناتيجەلى قۇرالى رەتىندە ءوز تيىمدىلىگىن دالەلدەدى. قازاقستان وسى تاجىريبەگە قوسىلىپ، ينۆەستيتسيالىق رەزيدەنتتىكتىڭ وزىندىك مودەلىن ۇسىنادى.
«التىن ۆيزالار» شەتەلدىك ينۆەستورلار ءۇشىن قولايلى ءارى بولجامدى ورتا قالىپتاستىرىپ، زاڭدى كەپىلدىكتەر بەرۋگە جانە ەلدىڭ ينۆەستيتسيالىق احۋالىنا سەنىمدى نىعايتۋعا باعىتتالعان. بۇل جاڭا باستاما ەلدىڭ اشىقتىققا، كاپيتالدى قورعاۋعا جانە تۇراقتى حالىقارالىق ەكونوميكالىق بايلانىستاردى دامىتۋعا باعىتتالعان ستراتەگيالىق باعدارىن كورسەتەدى، - دەلىنگەن س ءى م حابارلاماسىندا.
قۇجات رەسمي جاريالانعاننان كەيىن 10 كۇن وتكەن سوڭ كۇشىنە ەنەدى.
ايتا كەتەلىك قازاقستاننىڭ كوشپەلى ۆيزاسىن العاندار سالىقتى قالاي تولەيتىنى تۋرالى جازعان ەدىك.
