قازاقستان حالىق ۇنىنە قۇلاق اساتىن ەل ەكەنىن تاعى دا دالەلدەپ وتىر - وزبەكستاندا داۋىس بەرگەن قازاقستاندىق
تاشكەنت. KAZINFORM - بۇل رەفەرەندۋم - قازاقستاننىڭ حالىق ۇنىنە قۇلاق اساتىن ەل ەكەنىن تاعى ءبىر مارتە دالەلدەپ وتىر. مۇنداي پىكىردى تاشكەنت قالاسىندا ورنالاسقان № 399-رەفەرەندۋم ۋچاسكەسىندە العاش بولىپ داۋىس بەرگەن قازاقستاندىق ءزامزا حايرۋللينا ءبىلدىردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
وزبەكستاندا ىسساپارمەن جۇرگەن ءزامزا حايرۋللينا ەلدىك ماسەلەلەردە تاڭداۋ جاساۋدان قالىس قالماي، ازاماتتىق ۇستانىمىن ءبىلدىرۋ ماڭىزدى دەپ سانايدى.
«بۇل رەفەرەندۋم - قازاقستاننىڭ حالىق ۇنىنە قۇلاق اساتىن ەل ەكەنىن تاعى ءبىر مارتە دالەلدەپ وتىر. مەن - دارىگەرمەن، 10 كۇن بويى وزبەكستاندا ىسساپارمەن ءجۇرمىن. سوندىقتان ءوزىمنىڭ ازاماتتىق كوزقاراسىمدى ءبىلدىرىپ، تاشكەنت قالاسىندا ورنالاسقان رەفەرەندۋم ۋچاسكەسىندە داۋىس بەرىپ جاتىرمىن. بۇل ءار ازامات ءۇشىن ماڭىزدى دەپ ويلايمىن، سوندىقتان ەلدىك ماسەلەلەردە تاڭداۋ جاساۋدان قالىس قالۋ ورىنسىز دەپ سانايمىن»، - دەپ پىكىر قوستى ءزامزا حايرۋللينا.
العاشقىلاردىڭ ءبىرى بولىپ داۋىس بەرگەن تاعى ءبىر قازاقستان ازاماتى انارحان مادياروۆا دا رەفەرەندۋم - ءار ازامات ءۇشىن ماڭىزدى تاڭداۋ جاسايتىن كەزەڭ ەكەنىن اتاپ ءوتتى.
«ءاربىر وتانداسىمىز ءۇشىن ماڭىزدى تاڭداۋ جاسايتىن كەزەڭ. مەن قازاقستان ازاماتىمىن، دەگەنمەن 30 جىلعا جۋىق وزبەكستاندا جۇمىس ىستەپ كەلەمىن. ءارقاشان ۇلتتىق ماسەلەلەردەن شەت قالعان ەمەسپىز. بۇگىن رەفەرەندۋمدا داۋىس بەرىپ، ءوز تاڭداۋىمدى جاسادىم»، - دەدى انارحان مادياروۆا.
ەسكە سالايىق، تاشكەنت قالاسىنداعى №399-رەفەرەندۋم ۋچاسكەسى قازاقستان رەسپۋبليكاسىنىڭ ەلشىلگى عيماراتىندا (اباي كوشەسى، 1) ورنالاسقان. وندا داۋىس بەرۋ جەرگىلىكتى ۋاقىت بويىنشا 20:00-گە دەيىن جالعاسادى.
بۇعان دەيىن سەۋلدەگى رەفەرەندۋمدا ءبىرىنشى قازاقستاندىق بولىپ حالىقارالىق ۇيىم قىزمەتكەرى كاميلا ماۋتوۆا داۋىس بەرگەنىن جازعان بولاتىنبىز.
سونداي-اق، بەيجىڭدەگى قازاقستان رەسپۋبليكاسىنىڭ ەلشىلىگى مەن شاڭحاي جانە گونكونگتاعى قازاقستاننىڭ باس كونسۋلدىقتارىندا اتوم ەلەكتر ستانساسىن (ا ە س) سالۋ جونىندەگى رەسپۋبليكالىق رەفەرەندۋمعا داۋىس بەرۋ پۋنكتتەرى اشىلدى.
اۆتور
ءاليحان اسقار
