قازاقستان حالقىنىڭ 35 پايىزى - بالالار
استانا. KAZINFORM - وقۋ-اعارتۋ مينيسترلىگى بالالاردىڭ قۇقىعىن قورعاۋ كوميتەتىنىڭ ءتوراعاسى ناسىمجان وسپانوۆا بالالاردىڭ اقپاراتتىق، سيفرلىق قاۋىپسىزدىگى ماسەلەسىن كوتەردى.
- ەلىمىزدە بالالاردىڭ سانى 7 ميلليونعا جۋىقتادى، بۇل حالىقتىڭ 35 پايىزى. بالا قۇقىقتارى تۋرالى كونۆەنسياعا سايكەس، مەملەكەت كامەلەتكە تولماعانداردىڭ پسيحيكالىق جانە فيزيكالىق ساۋلىعىنا زيان كەلتىرۋى مۇمكىن اقپاراتتار مەن ماتەريالدارعا قول جەتكىزۋىن بولدىرماۋى ءتيىس. وسى ورايدا 2023 -جىلى وقۋ-اعارتۋ مينيسترلىگى يۋنيسەف بىرلەسىپ زەرتتەۋ جۇرگىزدى. زەرتتەۋدىڭ ماقساتى - بالالاردىڭ سيفرلىق ساۋاتتىلىعىن تەكسەرىپ، ينتەرنەتتەن كەلۋى مۇمكىن قاۋىپتەردى انىقتاۋ. ناتيجە الاڭداتارلىق بولىپ شىقتى، - دەدى ناسىمجان وسپانوۆا.
بالالاردىڭ قۇقىعىن قورعاۋ كوميتەتى باسشىسىنىڭ ايتۋىنشا، اقپارات بالانىڭ پسيحيكاسىنا ايتارلىقتاي اسەر ەتەدى. كەز كەلگەن اقپاراتتىڭ ەكى قىرى بار.
- جاعىمسىز اقپاراتتارعا كەلسەك، بالانىڭ ويىن وزگەرتەدى جانە بۇرمالايدى، قيالىنا ىقپال ەتەدى، جاڭا مىنەز-قۇلىق ۇلگىسىن قالىپتاستىرادى، سونىڭ سالدارىنان ونىڭ پسيحيكالىق جانە پسيحو-ەموتسيونالدىق دەنساۋلىعىنا زيان كەلەدى. ودان بولەك، بالالار اراسىنداعى زورلىق-زومبىلىق، جەكە دەرەكتى قولدانۋ قاۋپى بار، - دەيدى ول.
بۇگىن ەلوردادا ل گ ب ت ناسيحاتتىڭ بالالار مەن جاسوسپىرىمدەرگە اسەرىن زەرتتەۋ ناتيجەسى تالقىلاندى. اتالعان شاراعا ساراپشىلار، عالىمدار، مەملەكەتتىك ورگاندار وكىلدەرى، دەپۋتاتتار مەن قوعامدىق ۇيىمدار وكىلدەرى قاتىستى.
ايتا كەتەيىك، زەرتتەۋ ناتيجەسىندە بەلگىلى بولعانداي، قازاقستاندىق جاسوسپىرىمدەردىڭ 10-12 پايىزى بەيتانىس اداممەن كەزدەسۋگە بارعانىن مويىنداعان.
اۆتور
داۋلەت ىزتىلەۋ
