قازاقستان حالقىنا تولەنەتىن جاردەماقى ءبىر جىلدا 70 پايىز ءوستى
استانا. KAZINFORM - 2023 -جىلى مەملەكەتتىك الەۋمەتتىك ساقتاندىرۋ قورىنان شامامەن 1,3 ميلليون قازاقستاندىق 750,7 ميلليارد تەڭگە سوماسىنا الەۋمەتتىك تولەم الدى، بۇل 2022 -جىلمەن سالىستىرعاندا 70 پايىزعا كوپ.
ەڭبەككە قابىلەتىنەن ايىرىلعان جاعدايدا تولەنەتىن الەۋمەتتىك تولەم بيۋدجەت قاراجاتى ەسەبىنەن مۇگەدەكتىگى بويىنشا مەملەكەتتىك الەۋمەتتىك جاردەماقىعا قوسىمشا تاعايىندالادى.
م ءا س ق-تەن تولەم مەديتسينالىق-الەۋمەتتىك ساراپتامادا بەلگىلەنگەن 30 پايىزدان 100 پايىزعا دەيىنگى دارەجەدە جانە ەڭبەك قىزمەتىن جالعاستىرۋىنا قاراماستان جالپى ەڭبەككە قابىلەتتىلىگىن جوعالتۋ كەزەڭىندە جۇزەگە اسىرىلادى.
2023 -جىلى اتالعان تولەمدى 38,7 ميلليارد تەڭگە سوماسىنا 100 مىڭنان استام ادام الدى، بۇل 2022 -جىلمەن سالىستىرعاندا 27 پايىزعا كوپ.
بەلگىلەنگەن تولەمنىڭ اي سايىنعى ورتاشا مولشەرى - 47445 تەڭگە.
اسىراۋشىسىنان ايىرىلعان جاعدايدا تولەنەتىن الەۋمەتتىك تولەم مىندەتتى الەۋمەتتىك ساقتاندىرۋ جۇيەسىنە قاتىسۋشىنىڭ اسىراۋىندا بولعان ادامدارعا بيۋدجەت قاراجاتى ەسەبىنەن تولەنەتىن اسىراۋشىسىنان ايىرىلۋى بويىنشا مەملەكەتتىك الەۋمەتتىك جاردەماقىسىنا قوسىمشا تاعايىندالادى.
م ءا س ق-تەن تولەم اسىراۋىنداعى ادامدار 18 جاسقا تولعانعا دەيىن، ال كۇندىزگى وقۋ نىسانىندا وقىعان جاعدايدا 23 جاسقا دەيىن تولەنەدى.
وتكەن جىلى اتالعان تولەم اسىراۋشىسىنان ايىرىلعان 64,3 مىڭ وتباسىعا 26,8 ميلليارد تەڭگە سوماسىندا بەرىلدى، بۇل 2022 -جىلعى سومامەن سالىستىرعاندا 26 پايىزعا ارتىق.
بەلگىلەنگەن تولەمنىڭ اي سايىنعى ورتاشا مولشەرى - 51574 تەڭگە.
جۇمىسىنان ايىرىلعان جاعدايدا تولەنەتىن الەۋمەتتىك تولەم الەۋمەتتىك ساقتاندىرۋ جۇيەسىنە قاتىسۋشىعا ونىڭ جۇمىستان شىعارىلۋ سەبەبىنە قاراماستان تاعايىندالادى. نەگىزگى شارت - جۇمىسسىز رەتىندە تىركەلۋ.
تولەم جۇيەگە قاتىسۋ وتىلىنە بايلانىستى 1 ايدان 6 ايعا دەيىن جۇزەگە اسادى.
تولەم مولشەرى 2023 -جىلعى 1-قاڭتاردا 40 پايىزدان 45 پايىزعا دەيىن ۇلعايتىلعان جۇمىسسىز رەتىندە تىركەلۋ الدىنداعى سوڭعى 2 جىل ىشىندە م ءا س ق-عا الەۋمەتتىك اۋدارىمدار جۇرگىزىلگەن ورتاشا ايلىق تابىسقا، جۇيەگە قاتىسۋ وتىلىنە جانە تابىستى الماستىرۋ كوەففيتسيەنتىنە بايلانىستى بولادى.
2023 -جىلى بۇل تولەم 49,9 ميلليارد تەڭگە سوماسىندا تولەنىپ، ونى 224,1 مىڭ ادام الدى، بۇل 2022 -جىلعى الۋشىلار سانىنان 2 ەسە ارتىق.
ءوسىم وتباسىنىڭ سيفرلىق كارتاسىن ەنگىزۋمەن بايلانىستى، ونىڭ شەڭبەرىندە جۇمىسىنان ايىرىلۋ بويىنشا تولەم پرواكتيۆتى تۇردە تاعايىندالادى، سونداي-اق ازاماتتاردان ەلەكتروندى ۇكىمەت پەن ەلەكتروندىق ەڭبەك بيرجاسى پورتالدارى، سونداي-اق كەيبىر ەكىنشى دەڭگەيدەگى بانكتەردىڭ موبيلدى قوسىمشالارى ارقىلى تولەم جاساۋعا وتىنىشتەر بەرۋدىڭ ەلەكتروندىق نىسانىن تالاپ ەتۋمەن بايلانىستى. بەلگىلەنگەن تولەمنىڭ اي سايىنعى ورتاشا مولشەرى شامامەن 60 مىڭ تەڭگەنى قۇرادى.
جۇكتىلىككە جانە بوسانۋعا، جاڭا تۋعان بالانى (بالالاردى) اسىراپ الۋعا بايلانىستى تابىسىنان ايىرىلۋ جاعدايى بويىنشا الەۋمەتتىك تولەم جۇكتىلىك جانە بوسانۋ بويىنشا دەمالىستىڭ بارلىق كۇندەرىنە تاعايىندالادى.
تولەم مولشەرى جۇكتىلىككە جانە بوسانۋعا بايلانىستى دەمالىس كۇنىنە دەيىنگى سوڭعى 12 ايدا م ءا س ق-كە الەۋمەتتىك اۋدارىمدار جۇرگىزىلگەن ورتاشا ايلىق تابىسقا جانە ەڭبەككە جارامسىزدىق كۇندەرىنىڭ سانىنا بايلانىستى.
2023 -جىلى بۇل ءبىرجولعى تولەمدى جالپى سوماسى 348,2 ميلليارد تەڭگەگە 287,5 مىڭ ادام الدى، بۇل 2022 -جىلعى سومامەن سالىستىرعاندا شامامەن 2 ەسە كوپ.
تاعايىندالعان تولەمنىڭ ورتاشا مولشەرى - 1244813 تەڭگە.
ءبىر جارىم جاسقا دەيىنگى بالا كۇتىمىنە بايلانىستى تابىسىنان ايىرىلۋ جاعدايى بويىنشا اي سايىنعى الەۋمەتتىك تولەم بالانىڭ تۋعان كۇنىنەن باستاپ الەۋمەتتىك ساقتاندىرۋ جۇيەسىنە قاتىسۋشىعا تاعايىندالادى.
تولەم مولشەرى سوڭعى 2 جىلدا م ءا س ق-كە الەۋمەتتىك اۋدارىمدار جۇرگىزىلگەن ورتاشا ايلىق تابىستىڭ 40 پايىزىن قۇرايدى.
ەكى جانە ودان دا كوپ بالا تۋعان كەزدە تولەم ءاربىر بالاعا جەكە تاعايىندالادى.
2023 -جىلى بۇل تولەم 312,7 مىڭ ادامعا تاعايىندالدى، ونىڭ اي سايىنعى ورتاشا مولشەرى 68957 تەڭگەنى قۇرادى.
تولەم 287 ميلليارد تەڭگە سوماسىنا جۇرگىزىلدى، بۇل 2022 -جىلمەن سالىستىرعاندا 67 پايىزعا كوپ.
كورسەتىلگەن تولەمنىڭ ءوسۋى 2023 -جىلعى قاڭتاردان باستاپ تولەم كەزەڭىنىڭ ءبىر جىلدان ءبىر جارىم جىلعا دەيىن ۇلعايۋىمەن بايلانىستى.
وسىلايشا، مىندەتتى الەۋمەتتىك ساقتاندىرۋ جۇيەسىنە قاتىساتىن جۇمىس ىستەيتىن ازاماتتاردى الەۋمەتتىك قورعاۋ جۇمىس ىستەمەيتىندەرگە قاراعاندا الدەقايدا جوعارى.
