قازاقستان حالقى اسسامبلەياسىنىڭ كەزەكتى سەسسياسى باستالدى
استانا. KAZINFORM - ەلورداداعى تاۋەلسىزدىك سارايىندا مەملەكەت باسشىسى قاسىم-جومارت توقايەۆتىڭ قاتىسۋىمەن قازاقستان حالقى اسسامبلەياسىنىڭ كەزەكتى XXXIV سەسسياسى باستالدى.
كەڭەيتىلگەن وتىرىستىڭ كۇن ءتارتىبى - «قازاقستان حالقى اسسامبلەياسىنىڭ 30 جىلدىعى: قورىتىندىلار جانە بولاشاق مىندەتتەر».
ايتا كەتەيىك، كەشە بەيبىتشىلىك جانە كەلىسىم سارايىندا قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسى ءوتتى.
وتىرىسقا ق ر پرەزيدەنتىنىڭ ىشكى ساياسات جانە كوممۋنيكاتسيالار ماسەلەلەرى جونىندەگى كومەكشىسى ارمان قىرىقبايەۆ، ق ر پارلامەنتىنىڭ دەپۋتاتتارى، قازاقستان حالقى اسسامبلەياسى كەڭەسىنىڭ مۇشەلەرى، رەسپۋبليكالىق ەتنومادەني بىرلەستىكتەردىڭ باسشىلارى مەن مۇشەلەرى، قحا قوعامدىق قۇرىلىمدارىنىڭ وكىلدەرى قاتىستى. اسسامبلەيا ينستيتۋتىنىڭ ەلدەگى بىرلىك پەن كەلىسىمدى نىعايتۋداعى ءرولى، سونداي-اق ەلىمىزدەگى اۋقىمدى وزگەرىستەر بارىسىنداعى ەرەكشە ماڭىزى اتاپ ءوتىلدى.
اسسامبلەيانىڭ 30 جىلدىعى اياسىندا اتقارىلىپ جاتقان جۇمىستار مەن وعان قوعامنىڭ كەڭىنەن اتسالىسۋى ايتىلدى. كەڭەس قاتىسۋشىلارى قازاقستان حالقى اسسامبلەياسىنىڭ 30 جىل ىشىندەگى ەتنوسارالىق بىرلىك پەن كەلىسىمدى نىعايتۋعا قوسقان ۇلەسىن، «ءارالۋاندىقتاعى بىرلىك»، «ءبىز ءارتۇرلىمىز - ءبىراق تەڭبىز» قاعيداتتارىن قوعامدا ساقتاۋ مەن ىلگەرىلەتۋدىڭ ماڭىزىن ەرەكشە اتاپ ءوتتى.
17-ساۋىردە مەملەكەت باسشىسىنىڭ وكىمدەرىمەن راسۋل سۋرماليەۆيچ احمەتوۆ جانە دميتري ۆالەريەۆيچ وستانكوۆيچ قازاقستان حالقى اسسامبلەياسى ءتوراعاسىنىڭ ورىنباسارلارى بولىپ تاعايىندالعان ەدى.
بۇعان دەيىن 30 جىلدا اسسامبلەيا قازاقستان قوعامىنا نە بەرە العانىن جازعان ەدىك.
سوناۋ 1995 -جىلدىڭ 1-ناۋرىزىندا قۇرىلعان قازاقستان حالقى اسسامبلەياسىنا بيىل 30 جىل تولىپ وتىر. تۇراقتىلىق پەن بەيبىتشىلىكتىڭ جارشىسىنا اينالعان ۇيىمنىڭ مەرەيلى بەلەسى اياسىندا بيىل 150 دەن اسا ءىس-شارا ۇيىمداستىرىلماق.
قازاقستان حالقى اسسامبلەياسىنىڭ 14 دوستىق ەلشىسى بىرلىك پەن كەلىسىمنىڭ قازاقستاندىق ۇلگىسىن ۇسىنا وتىرىپ، باسقا ەلدەرمەن ءوزارا ىنتىماقتاستىقتى دامىتۋعا ەرەكشە ۇلەس قوسىپ كەلەدى. قوعامدىق كەلىسىم مەن جالپىۇلتتىق بىرلىكتى ساقتاۋعا ات سالىسقاندارعا «ەل بىرلىگى» وردەنى تابىستالادى.
اۆتور
مارلان جيەمباي
