قازاقستان فۋتبولىنداعى قارجى قالاي تالان-تاراجعا ءتۇستى؟
استانا. KAZINFORM - قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ قازاقستان فۋتبول فەدەراتسياسىنىڭ بۇرىنعى باسشىسى ادىلەت بارمەنقۇلوۆقا قارسى قىلمىستىق ءىس بارىن جوققا شىعاردى.
جۋىردا باس پروكۋراتۋرا ق ف ف جانە ءبىرقاتار فۋتبول كلۋبىن تەكسەرگەننەن كەيىن 3 ميلليارد تەڭگە كولەمىندە زاڭبۇزۋشىلىق انىقتالعانىن مالىمدەدى. فەدەراتسيانىڭ بۇرىنعى باسشىلارىنا قارسى قىلمىستىق ءىس قوزعالىپ، قارجىلىق مونيتورينگ اگەنتتىگىنە جولدانعانى ايتىلدى.
«شىنىندا دا، قازاقستان فۋتبول فەدەراتسياسىنا قاتىستى جىمقىرۋ دەرەگى بويىنشا قىلمىستىق ءىس قوزعالعان. قازىر سوتالدى تەرگەۋدىڭ باسقا دەرەكتەرىن اشىپ ايتا المايمىن. ءبىراق بۇگىندە بارمەنقۇلوۆتى كۇدىكتى دەپ تانىعان جوقپىز. وعان قاتىستى باپتار بەلگىلەنبەگەن»، - دەدى ەلەمەسوۆ سەنات دالىزىندە.
19-قاراشادا قازاقستان فۋتبول فەدەراتسياسى ەكس-پرەزيدەنت ادىلەت بارمەنقۇلوۆتىڭ وتستاۆكاسىن رەسمي تۇردە قابىلدادى.
ەسكە سالايىق، بۇعان دەيىن باس پروكۋراتۋرا مالىمدەمە جاساپ، قازاقستان فۋتبول فەدەراتسياسىنىڭ بۇرىنعى باسشىلىعى كەزىندە جاسالعان زاڭبۇزۋشىلىقتار انىقتالعانىن ايتتى.
ونىڭ قاتارىندا ورىنسىز سىياقى تولەۋ، ينفراقۇرىلىم نىسانىن سالۋ كەزىندە قاراجاتتى ماقساتسىز پايدالانۋ، سپورتشىلارمەن جاسالعان كۇماندى كەلىسىمدەر جانە سپورتشىلاردى تاماقتاندىرۋعا بولىنگەن قارجىنى جىمقىرۋ دەرەكتەرى بار.
