قازاقستان فۋتبول كلۋبتارى جەكەشەلەندىرىلۋى مۇمكىن
الماتى. KAZINFORM - قازاقستانداعى قازىر مەملەكەتكە تيەسىلى فۋتبول كلۋبتارى جاقىن ارادا جەكە ينۆەستورلاردىڭ قولىنا ءوتۋى مۇمكىن.
پرەزيدەنت قاسىم-جومارت توقايەۆ بۇعان دەيىن مەملەكەتتىك ورگاندارعا فۋتبول كلۋبتارىن جەكەشەلەندىرۋدى تاپسىرعان ەدى. پرەمەر- مينيستر ولجاس بەكتەنوۆتىڭ دەپۋتاتتىق ساۋالعا بەرگەن جاۋابىنا قاراعاندا، پرەزيدەنت تاپسىرماسىن ورىنداۋ بويىنشا جۇمىستار ناتيجەسىن بەرە باستادى.
قازىردىڭ وزىندە فۋتبول كوماندالارىن ساتىپ الۋعا نيەتتى جەكە كومپانيالار مەن ءىرى بيزنەس وكىلدەرى تابىلعان.
- «ورتالىق ازيا جانارماي- ەنەرگەتيكالىق كومپانياسى» اق (سەرگەي كان) «قىزىل- جار» كلۋبىن ساتىپ الۋعا قىزىعۋشىلىق ءبىلدىردى؛ Freedom Finance (تيمۋر تۋرلوۆ) «شاحتەر» كلۋبىنا ارنالعان جاڭا ستاديون مەن اكادەميا سالۋدى كوزدەپ وتىر. Kaspi Group (ميحايل لومتادزە) - «جەڭىس» كلۋبىن ساتىپ الىپ، استانادا فۋتبول ينفراقۇرىلىمىن دامىتۋعا نيەتتى. TAU GROUP LTD (يسلام قوزباقوۆ) «قايسار» كلۋبىن ساتىپ الۋدى جوسپارلاپ وتىر. سونداي-اق «تاراز»، «ەلىماي» جانە «ەرتىس» كلۋبتارى بويىنشا دا كەلىسسوزدەر ءجۇرىپ جاتىر. پروتسەستى جەدەلدەتۋ ءۇشىن ۇكىمەت 2021-2025 -جىلدارعا ارنالعان كەشەندى جەكەشەلەندىرۋ جوسپارىن جاڭارتىپ، قۇجاتتى مەملەكەتتىك ورگاندارمەن كەلىسۋ كەزەڭىندە، - دەلىنگەن پرەمەر-ءمينيستردىڭ جاۋابىندا.
ازىرشە كلۋبتار ءالى ساتىلماعان، سوندىقتان ولار مەملەكەتتىك بيۋدجەت ەسەبىنەن قارجىلاندىرىلىپ وتىر. 2025 -جىلعا فۋتبولعا 34,9 ميلليارد تەڭگە قاراستىرىلعان، ونىڭ ىشىندە 31,8 ميلليارد تەڭگە - كاسىبي كلۋبتارعا، 3,1 ميلليارد تەڭگە - بالالار جانە بۇقارالىق سپورتقا باعىتتالعان.
الايدا بۇل قاراجاتتىڭ جۇمسالۋى مۇقيات تەكسەرىلىپ جاتىر.
- 2021-2025 -جىلدار ارالىعىندا جۇرگىزىلگەن اۋديت ناتيجەسىندە 12-دەن استام تەكسەرىس ءوتتى. 100-دەن استام زاڭبۇزۋشىلىق انىقتالدى، ونىڭ ىشىندە ارتىق سمەتا، قايتالانعان قىزمەتتەر مەن ءتيىمسىز شىعىندار بار. «اقتوبە» جانە « قىزىل-جار» كلۋبتارىندا سىبايلاس جەمقورلىق بەلگىلەرى انىقتالعان. مىسالى، اقتوبە وبلىسىنىڭ پروكۋراتۋراسى 250 ميلليون تەڭگەدەن استام قارجىنىڭ ماقساتسىز جۇمسالعانىن انىقتادى. ونىڭ ىشىندە ويىنشىلارعا نەگىزسىز بونۋس تولەۋ مەن مەردىگەرلەردىڭ باعانى كوتەرىپ كورسەتۋى بار، - دەپ جازىلعان رەسمي جاۋاپتا.
ەسكە سالايىق، بۇعان دەيىن پرەمەر-مينيستر ولجاس بەكتەنوۆ تۋريزم جانە سپورت مينيسترلىگىنە تەز ارادا الماتى تاۋ كلاستەرىن دامىتۋ جوسپارىن جاڭارتۋدى جانە فۋتبول كلۋبتارىن جەكەشەلەندىرۋدىڭ جوسپار-كەستەسىن ازىرلەۋدى تاپسىرعانىن حابارلاعانبىز.
اۆتور
مەيىرمان لەس
